Qanlıkól rayonında 2022-jıldan berli puqaralardı qollap-quwatlaw, máhállelerdiń infrastrukturasın rawajlandırıw boyınsha Sırdárya wálayatı menen birgelikte bir qatar iygilikli jumıslar ámelge asırıldı.

Sırdárya wálayatınıń hákimi Erkinjon Turdimovtıń basshılıǵında bir topar wálayat belsendileri Qanlıkól rayonında miyman boldı.

Miymanlardı Qaraqalpaqstan Respublikası Ministrler Keńesiniń Baslıǵı F.Ermanov, rayon hákimi B.Sultanov hám basqalar kútip aldı. Miymanlar rayon aymaǵında qurılıs, awıl xojalıǵı hám basqa da baǵdarlarda islengen jumıslar menen tanıstı.

Ministrler Keńesiniń Baslıǵı F.Ermanov Sırdárya wálayatınıń hákimi E.Turdimovtıń basshılıǵında Qanlıkól rayonı hákimliginde rayondı sociallıq-ekonomikalıq jaqtan rawajlandırıwǵa qaratılǵan iri joybarlar dodalandı.

Ilajda rayon hákimi B.Sultanov rayonda qurılıs hám arxitektura, awıl xojalıǵı, isbilermenlikti rawajlandırıw arqalı jańa jumıs orınların jaratıw imkaniyatı, bunıń ushın qolaylı isbilermenlik ortalıǵın jaratıw boyınsha jańa joybarların usındı.

Sırdárya wálayatı menen birgelikte awıl xojalıǵın rawajlandırıw, óndiristi arttırıw boyınsha bir qatar kelisimler eki tárepleme maqullandı.

Bul jumıslardı tez hám sapalı ámelge asırıw boyınsha ilajlar belgilendi.

Soń miymanlar rayondaǵı awıl xojalıǵı texnikalarına kompleksli xızmet kórsetiwshi Texnika-servis orayınıń jumısı menen tanıstı. «AGROHAMKOR CLUSTER» JShJnıń fermerlerge texnikalıq xızmet kórsetiwi úyrenilip, aldaǵı rejeleri menen tanıstı. Awıl xojalıǵı baǵdarında rayon kóp imkaniyatlarǵa iye ekenligi atap ótilip, birge islesiw mexanizmlerin jaratıw ilajları belgilendi.

Ramazan – mehir-múriwbet, awızbirshilik hám shúkirshilik ayı.

Sırdárya wálayatı hám Qanlıkól rayonı hákimligi birgelikte rayon xalqı ushın Iftarlıq shólkemlestirdi.

Ilajda Ministrler Keńesiniń Baslıǵı F.Ermanov, Sırdárya wálayatınıń hákimi E.Turdimov, rayon hákimi B.Sultanov hám basqalar jıynalǵanlardı Ramazan ayı menen qızǵın qutlıqlap, ótkerilip atırǵan ilajdıń áhmiyetine toqtap ótti.

Bul ilaj tek ǵana ekonomikalıq birge islesiw emes, al shın júrekten tuwısqanlıq hám miyrim-shápáát rámzi ekenin jáne bir márte kórsetti.

Qaraqalpaqstan xabar agentligi