Jaqın Shıǵıs regionında júzege kelgen jaǵdaydıń keskinlesiwi hám hawa keńisliginen paydalanıw boyınsha engizilgen waqtınsha sheklewler sebepli bir qatar aviaqatnawlar biykar etilmekte.
Usı múnásibet penen Ózbekstan Respublikası Sırtqı isler ministrligi puqaralarǵa usı aymaqtaǵı mámleketlerge sapar shólkemlestirmewdi, házirgi waqıtta sol jerlerde bolıp turǵan watanlaslarǵa bolsa abaylılıq ilajların kúsheytiwdi usınıs etken.
Bul jaǵdaydı inabatqa alǵan halda, puqaralardıń qáwipsizligin támiyinlew maqsetinde Ózbekstan musılmanları basqarması hám turoperatorlar tárepinen shólkemlestirilip atırǵan umra saparları waqtınsha keshiktirilgeni málim etildi.
Sonıń ishinde, 2026-jıl 2-mart kúni rejelestirilgen Tashkent-Jidda jónelisindegi gezektegi umra zıyaratshılarınıń reysi de belgili bir múddetke qaldırılǵan. Aviaqatnawlardıń qayta tikleniwi haqqında rásmiy dárekler arqalı qosımsha málimleme beriletuǵını bildirilgen. Watanlaslarımızdan bul jaǵdaydı durıs qabıl etiwi hám rásmiy maǵlıwmatlarǵa súyenip jumıs alıp barıwı soraladı.

ÓzA