Qońırat rayonı hákimliginde “Suvxwjaliknazorat” inspekciyasınıń baslıǵı Rustam Raximov tárepinen gezektegi kóshpeli qabıllaw bolıp ótti.
Ilajda rayon hákimi B.Madaminov, suw xojalıǵı shólkeminiń basshı hám jumısshı xızmetkerleri, isbilermenler, sonday-aq, fermer xojalıqlarınıń wákilleri qatnastı.
Dáslep suw resurslarınan nátiyjeli paydalanıw, irrigaciya infrastrukturasın modernizaciyalaw hám tarawda ámelge asırılıp atırǵan reformalar, Prezident qararları menen pármanlarınıń mazmun-mánisi haqqında túsinikler berildi. Olarda belgilengen wazıypalardı orınlarda tolıq hám sapalı orınlaw, suwdan aqılǵa uǵras paydalanıw hám resurslardı únemlew máselelerine ayrıqsha itibar qaratıldı.
Kóshpeli qabıllaw dawamında aymaqtaǵı fermer xojalıqlarınıń basshıları, isbilermenler hám suw xojalıǵı sistemasında jumıs alıp barıp atırǵan jumısshı-xızmetkerler tárepinen túrli sociallıq-ekonomikalıq máseleler boyınsha múrájatlar bildirildi.
Inspekciya baslıǵı R.Rahimov hár bir múrájattı ornında hár tárepleme úyrenip, zárúr túsinikler berdi. Nátiyjede 11 fermerdiń múrájatı unamlı sheshildi, 7 múrájat etiwshiniń múrájatı qadaǵalawǵa alındı.
Kóshpeli qabıllaw dawamında, tiykarınan, egislik maydanların suwǵarıwdaǵı mashqalalar, fermer xojalıqlarınıń ishki nasoslarında elektr energiyasınıń qárejetleri, ajıratılǵan limitlerden nátiyjeli paydalanıw, tamshılatıp suwǵarıw sistemasında ushırasıp atırǵan texnikalıq nasazlıqlar, sonday-aq, jer astı izey suwların azaytıw boyınsha ámeliy ilajlar dodalandı.
Bul múrájatlardı sheshiw boyınsha juwapker basshılarǵa anıq tapsırmalar berildi, al 5 múrájat boyınsha qosımsha úyreniwler ótkeriw belgilendi.
Sonday-aq, inspekciya baslıǵı tárepinen tiyisli shólkemlerdiń basshılarına nızamshılıqta belgilengen tártipte múrájatlardıń orınlanıwın qatań qadaǵalawǵa alıw, olardı úyrenip shıǵıw hám nátiyjeleri boyınsha fermer xojalıqlarınıń basshılarına jazba juwap xatların beriw boyınsha kórsetpeler berildi.
Múrájatlar boyınsha juwapkerlerge anıq wazıypalar júklenip, olardıń orınlanıwın támiyinlew boyınsha qatań qadaǵalaw ornatılatuǵını atap ótildi. Ayırım máselelerdi ornında sheshiw boyınsha operativ qararlar qabıl etildi, qosımsha úyreniw talap etiletuǵın múrájatlar bolsa belgilengen tártipte orınlawǵa qaratıldı.
Kóshpeli qabıllawdıń tiykarǵı maqseti – puqaralar hám fermer xojalıqları dus kelip atırǵan mashqalalardı ornında sheshiw, sistemadaǵı ashıq-aydınlıqtı támiyinlew, suw xojalıǵındaǵı áhmietli máselelerge ámeliy sheshim tabıwdan ibarat boldı.

Qaraqalpaqstan xabar agentligi