Sociallıq tarmaqlarda usı jıldıń 1-mart sánesinen tábiyǵıy gaz bahası artqanı haqqında xabarlar keń tarqaldı. Bul jaǵday boyınsha Energetika ministrligi múnásibet bildirdi.
Atap ótiliwinshe, sociallıq tarmaqlarda tarqalǵan usınday mazmundaǵı xabarlar haqıyqatqa tuwra kelmeydi. Usı jıldıń 1-mart kúninen tábiyǵıy gaz bahası kóterilmegen, tólemler eski tarifte ámelge asırılmaqta.
Bizge belgili, ısıtıw máwsiminde tábiyǵıy gazden paydalanıw boyınsha bazalıq norma 5 esege (100 metr kubtan 500 metr kubqa) arttırılǵan edi. Usı múnásibet penen, 1-mart kúninen baslap qıs máwsiminde belgilengen sociallıq norma ózgergen.
Atap aytqanda, noyabr-fevral aylarında hár ay ushın 500 kub metrge shekem, mart-oktyabr aylarında bolsa hár ay ushın 100 kub metrge shekem “bazalıq norma” belgilengen. Bul tártip Qaraqalpaqstan Respublikası hám Xorezm wálayatında oktyabr-fevral aylarında ámel etiwi belgilengen.
“Sol sebepli, búgin, 1-marttan 31-oktyabrge shekem hár ay ushın 100 kub metrge shekem “bazalıq norma” ámel etedi”, – delinedi ministrliktiń múnásibetinde.
Maǵlıwmat ushın, Ózbekstan Respublikası Prezidentiniń qararına tiykarlanıp mútáj shańaraqlarǵa jumsalǵan elektr energiyası hám tábiyǵıy gaz ushın mámleket tárepinen hár ayda kompensaciya beriledi.
Sonıń ishinde, kompensaciya muǵdarı:
• Elektr energiyası ushın – ayına bazalıq normadan (200 kVt•saattan keyingi) 150 kVt•saatqa shekem;
• Tábiyǵıy gaz ushın – qıs aylarında 250 kub metrge shekem, basqa aylarda 150 kub metrge shekemgi bazalıq normadan artıq paydalanılǵan bólegi ushın kompensaciya beriledi.
“Aldın kompensaciyalar tek qıs aylarında ámel etken bolsa, endi jıl dawamında hár ayda berilmekte”, – delinedi xabarda.

Qaraqalpaqstan xabar agentligi