Burın xabar bergenimizdey, hápte dawamında AQShtıń Sent-Jud balalar izertlew emlewxanasınıń vice-prezidenti Karlos Rodriges-Galindo basshılıǵındaǵı delegaciya mámleketimizdegi emlewxanalarda boldı.
Búgin Tashkent mámleketlik medicina universitetinde sırt elli ekspertlerdiń qatnasıwında baspasóz ánjumanı ótkerildi.
Ilajda densawlıqtı saqlaw ministriniń orınbasarı Elmira Basitxanova, sonday-aq, Amerika delegaciyasınıń wákilleri, JDSShnıń mámleketimizdegi wákilxanası, Balalar onkologiyası, gematologiyası hám immunologiyası ilimiy-ámeliy medicina orayınıń basshıları hám juwapker xızmetkerleri qatnastı.
Atap ótilgenindey, mámleketimizde balalar onkologiyası baǵdarında salmaqlı jumıslar ámelge asırılmaqta. Ózbekstan JDSSh hám Sent-Jud mákemesiniń baslaması menen balalar rak keselligine qarsı jolǵa qoyılǵan Globallıq platformaǵa birinshilerden bolıp qosılǵanı bul baǵdarda taslanǵan isenimli qádemlerden biri bolıp esaplanadı.
Balalar rak keselligine qarsı joqarı sapalı, nátiyjeli hám qáwipsiz dári-dármaq penen biypul támiyinlewge qaratılǵan bul iri joybar sheńberinde elimizdiń 14 aymaǵındaǵı emlewxanalar, Balalar onkologiyası, gematologiyası hám immunologiyası ilimiy-ámeliy medicina orayı jáne Balalar milliy medicina orayında emlenip atırǵan 2000 ul-qız ushın sapalı preparatlar biypul jetkerip berilmekte. Xalıqaralıq standartqa tiykarlanǵan bunday qurallar menen nawqas balalar 2028-jılǵa shekem úzliksiz támiyinlenedi.
Baspasóz ánjumanında elimizde balalar rak keselligine qarsı gúresiw baǵdarında alıp barılıp atırǵan jumıslar, sonıń ishinde, xalıqaralıq birge islesiwge baylanıslı áhmiyetli máseleler dodalandı. Sırt elli ekspertlerdiń elimizge ámeliy saparlarınıń nátiyjeleri haqqında da hár tárepleme maǵlıwmat berildi.
Bul retki delegaciya quramınan dúnyanıń jetekshi ekspertleri, sonıń ishinde, “St. Jude Global” xalıqaralıq baslaması wákilleri hám JDSSh Evropa regionallıq byurosınıń balalar onkologiyası hám palliativ járdem boyınsha qánigeleri orın alǵan. Sapar baǵdarlaması keń kólemli hám strategiyalıq xarakterge iye bolıp, perzentlerimizge kórsetilip atırǵan xızmettiń tiykarǵı tárepi – klinikalıq ámeliyat hám dári-dármaq támiynatınan baslap, tarawdı sanlastırıw hám palliativ járdemdi rawajlandırıwǵa shekemgi processti óz ishine qamtıp aldı.
Bir hápte dawamında miymanlar “Uzbekistan Airports Cargo” logistikalıq kompleksiniń jumısı hám Sanitariyalıq-epidemiologiyalıq tınıshlıq hám jámiyetlik salamatlıq komitetiniń vakcina qoymaxanasında onkologiyalıq dári quralların “suwıqlıq shınjırı” tiykarında saqlaw hám tasıw procesi menen jaqınnan tanıstı. Sonday-aq, Balalar gematologiyası, onkologiyası hám immunologiyası ilimiy-ámeliy medicina orayı, “Taskin” balalar onkologiyalıq xospisinde de boldı. Birden-bir integrator – “UZInfosom”da rak keselligine shalınǵan nawqaslardı elektron dizimge alıw hám baǵdarlaw, dári-dármaqlardıń balalarǵa qáwipsiz hám waqtında jetip barıwı sisteması haqqında maǵlıwmat aldı.
“Mehrli maktab” bilimlendiriw joybarı menen jaqınnan tanısqan sırt elli ekspertler elimizde usı baǵdarda alıp barılıp atırǵan keń kólemli reformalardı joqarı bahaladı.
Gwzal Sattorova, ÓzA