Qaraqalpaqstan Respublikası Ministrler Keńesiniń Baslıǵı F.Ermanov tárepinen aymaqlarda awıl xojalıǵı tarawın bunnan bılay da rawajlandırıw, bar mashqalalardı ornında úyreniw hám agrar tarmaq wákilleri menen ashıqtan-ashıq sóylesiwdi jolǵa qoyıw maqsetinde Qaraózek hám Shımbay rayonlarında ushırasıwlar shólkemlestirildi.
Ushırasıwlarda rayon hákimleri, fermer xojalıqlarınıń basshıları, klaster hám kooperaciya sistemasınıń wákilleri, taraw qánigeleri jáne tiyisli uyım hám shólkemlerdiń juwapkerleri qatnastı. Sóylesiwler dawamında ǵálle hám paxta jetistiriwdiń nátiyjeliligin arttırıw, egislik maydanlardan aqılǵa uǵras paydalanıw, agrotexnikalıq ilajlardı óz waqtında hám sapalı ámelge asırıw máselelerine ayrıqsha itibar qaratıldı.
Atap aytqanda, biyday jetistiriwde joqarı ónimdarlı sortlardan paydalanıw, mineral tóginlerdi belgilengen norma tiykarında qollanıw, suwǵarıw sistemasın jetilistiriw hám zúráátti nabıt etpey jıynap-terip alıw boyınsha máseleler kórip shıǵıldı. Paxta jetistiriw procesinde bolsa agrotexnikalıq tárbiya jumısların sapalı shólkemlestiriw, zamanagóy texnikalardan nátiyjeli paydalanıw hám ónimdarlıqtı arttırıw ilajları dodalandı.
Sonday-aq, paxtashılıqta aldıńǵı tájiriybe sıpatında “Shınjan” usılında paxta jetistiriwdi keńnen engiziw máselesi kórip shıǵıldı. Bul usıl arqalı suw hám resurs únemlewge erisiw, miynet ónimdarlıǵın arttırıw jáne joqarı hám turaqlı zúráát alıw imkaniyatları atap ótildi.
Bul baǵdarda juwapkerlerge ámeliy ilajlar kóriw boyınsha tapsırmalar berildi.
Sonıń menen birge, Ministrler Keńesiniń Baslıǵı awıl xojalıǵı aymaqlar ekonomikasınıń tayanısh tarmaǵı ekenin atap ótip, biyday hám paxta jetistiriwde joqarı nátiyjelerge erisiw arqalı azıq-awqat qáwipsizligin támiyinlew hám eksport potencialın arttırıw áhmiyetli wazıypa ekenin atap ótti.
Májilis sońında belgilengen wazıypalardıń orınlanıwın támiyinlew boyınsha juwapker basshılarǵa anıq kórsetpeler berildi.
Qaraqalpaqstan xabar agentligi