Prezident Shavkat Mirziyoevtiń basshılıǵında Surxandárya wálayatın kompleksli rawajlandırıw boyınsha májilis dawam etpekte.
Wálayattaǵı 49 mıń gektar qıytaq jerdiń 35 mıń gektarında 3-4 márte zúráát alınbaqta. Bunday kórsetkish birde-bir wálayatta joq.
Termiz rayonındaǵı “Qıytaq jer mektebi”nde qıytaq jerge ilim menen qatnas jasap, bir jılda bes mártege shekem egin egiw úyretilmekte. Bul tájiriybe pútkil Surxandáryada jolǵa qoyılsa, ónim jetistiriw de, eksport ta, eń tiykarǵısı, diyqanlardıń dáramatı da kóbeyetuǵını atap ótildi.
Tap Termiz rayonındaǵı sıyaqlı Angor, Uzun, Denovda “Qıytaq jer mektepleri”n shólkemlestiriw, olarda jılına 10 mıń xalıqtı oqıtıw tapsırıldı. Ulıwma, Termiz rayonınıń tájiriybesi tiykarında hár bir wálayatta ekewden “Innovaciyalıq qıytaq jer mektepleri” iske qosıladı.
Denov, Altınsay, Sariosiyo, Uzun rayonlarındaǵı bes mıń gektarda limonshılıq plantaciyası shólkemlestiriledi, Altınsaydaǵı altı mıń gektarda eksportqa jaramlı júzim jetistiriw boyınsha úsh jıllıq baǵdarlama islep shıǵıladı.
Uzun rayonında Yaponiya tájiriybesi tiykarında jaratılǵan keptirilgen qurma hám ánjirdiń milliy brendin úgit-násiyatlaw áhmiyetli ekenligi atap ótildi.

ÓzA