Prezident Shavkat Mirziyoevtiń basshılıǵında Surxandárya wálayatın kompleksli rawajlandırıw boyınsha májilisi dawam etpekte.
Wálayat hákimi, rayon hákimleri aldında usı jılı investiciyalardı 3 milliard dollarǵa, eksporttı 1 milliard dollarǵa jetkeriw wazıypası turǵanı atap ótildi.
Aymaqta kámbaǵallıqtı 2,8 procentke, jumıssızlıqtı 4,5 procentke túsiriw, Termiz qalası, Angor, Denov, Jarqorǵan, Qiziriq hám Muzrabattı “kámbaǵallıq hám jumıssızlıqtan jıraq aymaq”qa aylandırıw áhmiyetli ekeni atap ótildi.
Wálayat ekonomikasında sanaattıń úlesi sońǵı 9 jılda 5 esege ósip, 10 procentke jetti. Biraq bul ele de az ekenligi atap ótildi.
Wálayatta 100 million tonna kómir rezervi bolǵanı menen jılına tek ǵana 1 procenti qazıp alınbaqta. Usı jılı Baysındaǵı “Sanjar”, Altınsaydaǵı “Aqsuw”, kelesi jılı “Fangart” kánlerinde kómir qazıp alıwdı baslaw tapsırıldı.
Qubla Afrikanıń “Sosol” kompaniyası kómirden polipropilen, polietilen hám kauchuk islep shıǵarıwǵa qızıǵıwshılıq bildirgen. Sariosiyadaǵı “Qoraqon”, “Jemsonit”, “CHuqur”, “Bayram-1” kánlerine de qıtaylı investorlar 1 milliard dollar kirgiziwge tayar.
Ulıwma, bul rezervler – elektrotexnika, qurılıs materialları, ximiya, metallurgiya, avtomobil qurılısı tarmaqları ushın tayar shiyki zat bazası. Bul kánler átirapında sanaat kárxanaların jaylastırıw boyınsha esap-sanaǵı shıǵarılıp, keminde 200 million dollarlıq joybarlardı qáliplestiriw tapsırıldı.
Baysındaǵı “Bezaktop” káninde sapası Iran, Túrkiya, Italiya menen básekilese alatuǵın tábiyǵıy tas rezervleri úyrenilmey tur. Bunday taslar rezervi bolǵan kánlerde geologiya jumısların baslawǵa kórsetpe berildi.

ÓzA