Oliy Majlis Nızamshılıq palatasınıń deputatı, ÓzMTDP frakciyasınıń aǵzası Ruslan Djumamuratov Kegeyli rayonı kóp tarmaqlı poliklinikasında bolıp, usı medicinalıq mákemede kórsetilip atırǵan xızmetlerdiń sapası, xalıq ushın jaratılǵan qolaylıqlardıń jaǵdayın úyrendi.
Málim etiliwinshe, usı poliklinikanıń imaratı 1986-jılı 49 mıńǵa shamalas rayon turǵınlarınıń talabınan kelip shıǵıp qurılǵan. Búgingi kúnde rayon xalqınıń sanı 74 mıńǵa shamalastı.
Ushırasıwda xalıqtıń sanınıń artıp barıwı hám medicinalıq xızmetlerge bolǵan talaptıń ósiwin esapqa alıp, rayon aymaǵında zamanagóy talaplarǵa juwap beretuǵın jańa poliklinikanıń imaratın qurıw zárúrligi atap ótildi. Jańa imarat arqalı xalıqtı qabıl etiw quwatlılıǵın arttırıw, medicinalıq xızmetlerdiń qamtıp alıwın keńeytiw, nawqaslar hám medicina xızmetkerleri ushın jáne de qolaylı sharayatlar jaratıw imkaniyatı jaratıladı.
Sonday-aq, medicinalıq xızmetlerdiń sapasın arttırıw maqsetinde mákemeni zamanagóy diagnostika úskeneleri menen támiyinlew máselesine de ayrıqsha itibar qaratıldı.
Sonıń ishinde, rentgenologiyalıq tekseriwler ótkeriw ushın rentgen diagnostika apparatı hám joqarı anıqlıqta tekseriwlerdi ámelge asırıw imkaniyatın beretuǵın magnit-rezonans tomografiya apparatınıń zárúr ekenligi atap ótilip, bul úskenelerdi engiziw xalıqqa kórsetilip atırǵan medicinalıq xızmetlerdiń sapasın bunnan bılay da jaqsılawǵa xızmet etetuǵını atap ótildi.

Á.Jiyemuratov, Qaraqalpaqstan xabar agentligi