Berdaq atındaǵı Qaraqalpaq mámleketlik universitetinde Prezidentimiz tárepinen alǵa qoyılǵan jaslar siyasatın ámelde támiyinlew, jaslardıń pikir-usınısların qollap-quwatlaw hám olar menen ashıq pikirlesiwdi jolǵa qoyıw maqsetinde “Basshı hám jaslar” ushırasıwı shólkemlestirildi.
Bul ilaj Prezidentimiz tárepinen elimiz jasları menen ótkerilgen sóylesiwinde hár hápteniń piyshembi kúni ministrlikler, uyımlar, shólkemler hám jergilikli hákimliklerde “Jaslar kúni”n ótkeriw boyınsha berilgen tapsırmalardıń orınlanıwı sheńberinde shólkemlestirildi.
Ushırasıwǵa Qaraqalpaqstan Respublikası Ministrler Keńesi Baslıǵınıń orınbasarı B.Otemuratov, universitet rektorı B.Jollıbekov hám student-jaslar qatnastı.
Dáslep Ministrler Keńesi Baslıǵınıń orınbasarı B.Otemuratov jaslar mámleket rawajlanıwınıń tiykarǵı háreketlendiriwshi kúshi ekenin ayrıqsha atap ótti. Ol búgingi kúnde jaslar ushın jaratılıp atırǵan imkaniyatlar – sapalı bilim alıw, zamanagóy kásiplerdi iyelew, isbilermenlikti rawajlandırıw hám innovaciyalıq joybarlardı ámelge asırıw ushın keń sharayatlar bar ekenligin aytıp, student-jaslardı belsendilik, pidayılıq hám juwapkershilik penen háreket etiwge shaqırdı.
Sonday-aq, jaslardıń bántligi, startap joybarların qollap-quwatlaw hám olardıń sociallıq mashqalaların sheshiw baǵdarında ámelge asırılıp atırǵan jumıslar haqqında maǵlıwmat berdi.
Bunnan soń universitet rektorı B.Jollıbekov shıǵıp sóylep, joqarı bilimlendiriw sistemasında ámelge asırılıp atırǵan reformalar, bilimlendiriwdiń sapasın arttırıw, ilimiy jumıstı rawajlandırıw hám studentler ushın jaratılıp atırǵan zamanagóy sharayatlarǵa toqtap ótti. Rektor jaslardıń bilim alıwǵa bolǵan umtılısı universitet rawajlanıwınıń tiykarǵı faktorı ekenin atap ótip, hár bir studenttiń baslaması hám ideyası qollap-quwatlanatuǵının bildirdi.
Ushırasıw dawamında student-jaslar ózlerin qızıqtırǵan sorawlar menen múrájat etip, bilimlendiriw procesi, ámeliyat imkaniyatları, bántlik máseleleri, jaslar joybarların finanslıq qollap-quwatlaw hám sociallıq infrastrukturanı rawajlandırıw boyınsha usınısların bildirdi.
Ilaj juwmaǵında bunday ushırasıwlardı turaqlı túrde shólkemlestiriw, jaslardıń usınıs hám baslamaların ámeliy joybarlarǵa aylandırıw jáne olardıń potencialın júzege shıǵarıwǵa qaratılǵan jumıslardı izbe-iz dawam ettiriw zárúrligi atap ótildi.

Qaraqalpaqstan xabar agentligi