Ózbekstan texnikalıq jaqtan tártipke salıw agentliginde Franciyanıń abıraylı xalıqaralıq “Bureau Veritas” kompaniyasınıń Ózbekstandaǵı wákilxanasınıń wákilleri menen ushırasıw bolıp ótti.
Bul sóylesiw mámleketimizde texnikalıq jaqtan tártipke salıw, standartlastırıw hám muwapıqlıqtı bahalaw sistemasın bunnan bılay da jetilistiriwge qaratılǵan izbe-iz reformalardıń logikalıq dawamı boldı.
Ushırasıw dawamında sońǵı jıllarda tarawda ámelge asırılǵan sistemalı ózgerisler, atap aytqanda, sapa infrastrukturasın bekkemlew, xalıqaralıq standartlardı keńnen engiziw hám milliy ónimlerdiń básekige shıdamlılıǵın arttırıw baǵdarında alıp barılıp atırǵan jumıslar haqqında hár tárepleme maǵlıwmat berildi. Atap ótilgenindey, sapa infrastrukturasın xalıqaralıq talaplar tiykarında rawajlandırıw eksport kólemin kóbeytiw hám ónimlerdiń sırtqı bazarlarǵa erkin shıǵıwın támiyinlewde áhmiyetli faktor bolıp esaplanadı.
Tárepler laboratoriyalıq sınaqlar tarawında óz-ara tájiriybe almasıw, zamanagóy hám innovaciyalıq sınaq usılların engiziw, qánigelerdiń mamanlıǵın arttırıw boyınsha qospa oqıw baǵdarlamaların shólkemlestiriw máselelerin dodaladı. Sonday-aq, xalıqaralıq standartlar hám basqarıw sistemaların ámeliyatqa keńnen engiziw, muwapıqlıqtı bahalaw processlerin sanlastırıw hám ashıq-aydınlıqtı támiyinlew baǵdarlarında birge islesiw imkaniyatları kórip shıǵıldı.
“Bureau Veritas” wákilleri tarawdı xalıqaralıq standartlarǵa beyimlestiriw, globallıq standartlardan nátiyjeli paydalanıw ortalıǵın jaratıw hám zamanagóy bahalaw mexanizmlerin engiziw boyınsha óz usınısların bildirdi. Olar bunday birge islesiw tek ǵana sapa qadaǵalaw sistemasın bekkemlew emes, al investiciyalıq tartımlılıqtı arttırıwǵa da xızmet etetuǵının atap ótti.
Ushırasıw juwmaǵında tárepler bul sóylesiw óz-ara paydalı birge islesiwdi bunnan bılay da keńeytiw, xalıqaralıq aldınǵı tájiriybeni milliy ámeliyatqa nátiyjeli engiziw hám sapa infrastrukturasın jańa basqıshqa alıp shıǵıw jolında ayrıqsha áhmiyetke iye ekenin atap ótti.

Sh.Mamaturopova, ÓzA