Ózbekstan Respublikası Prezidenti Shavkat Mirziyoev 26-fevral kúni bolıp ótken telefon arqalı sóylesiwde Túrkiya Respublikası Prezidenti Rejep Tayyip Erdoǵandı tuwılǵan kúni menen qızǵın qutlıqladı.
Mámleketimiz basshısı Túrkiya jetekshisine bekkem densawlıq hám abadanlıq, mámleketshilik jumısında úlken tabıslar, tuwısqan túrk xalqına tınıshlıq-paraxatshılıq hám rawajlanıw tiledi.
Prezidentler, sonday-aq, pútkil musılman úmmeti ushın muqaddes bolǵan Ramazan ayı menen bir-birin qızǵın qutlıqladı.
Ózbekstan – Túrkiya keń kólemli strategiyalıq sheriklik qatnasıqların bıyıl yanvar ayında Ankara qalasında erisilgen joqarı dárejedegi kelisimlerdi ámelge asırıw sheńberinde bunnan bılay da bekkemlew máseleleri kórip shıǵıldı.
Mámleketleraralıq birge islesiwde joqarı dárejege erisilgeni qanaatlanıwshılıq penen atap ótildi. Jaqında bolıp ótken Strategiyalıq birge islesiw keńesi májilisiniń nátiyjeleri eki tárepleme qatnasıqlardı sapa jaǵınan jańa basqıshqa kótergeni atap ótildi.
Islep shıǵılǵan “jol kartaları” tiykarında kooperaciya joybarların alǵa qoyıwǵa ayrıqsha itibar qaratıldı.
Jetekshiler xalıqaralıq hám regionallıq áhmiyetke iye máseleler boyınsha da pikir alıstı, bolajaq ilajlar rejesin dodaladı.

ÓzA