Aldın xabar bergenimizdey Qırǵız Respublikasınıń Osh qalasında futbol boyınsha jas óspirimler arasında ótkerilgen xalıqaralıq turnirde Qaraqalpaqstan Respublikası futbol akademiyasınıń 2013-jılǵı tuwılǵan tárbiyalanıwshıları chempionlıqtı qolǵa kirgizgen edi.
Keshe turnir jeńimpazları atanǵan kishkene futbolshılarımız Nókis qalasında akademiya basshıları, trener-muǵallimler, ata-analar hám sport jankúyerleri tárepinen kútip alındı.
Onda Qaraqalpaqstan Respublikası futbol akademiyası direktorı Damir Iskenderov hám basqalar shıǵıp sóylep, komanda aǵzaları hám olardıń trenerlerin qolǵa kirgizgen bul jeńisi menen qutlıqladı hám olarǵa akademiyanıń estelik sawǵaların tapsırdı.
– Bul bizlerdiń sırt elde ótken jarısqa birinshi qatnasıwımız edi, – deydi turnir jeńimpazı Muxammedali Djabbarkulov. – Komandamız benen óz-ara túsinisip oynawımız nátiyjesinde óz qarsılaslarımızdı jeńip shıǵıwǵa miyasar boldıq. Bunda bizlerge trenerlerimiz úlken járdem etti. Aldaǵı waqıtları komandamız bul jeńisten qanaatlanıp qalmastan, jáne jańa tabıslardı qolǵa kirgiziw ushın alǵa basa beremiz.

Adilbay Orazov, Qaraqalpaqstan xabar agentligi sholıwshısı