2026-jıldıń zúrááti ushın egilgen biyday tárbiyası hám bıyılǵı paxta egisi aldınan orınlarda tiyisli qánigelerdiń qatnasıwındaǵı túsinik jumısları, seminarlar qızǵın dawam etpekte.
Qońırat rayonındaǵı Ájiniyaz awıl puqaralar jıyını aymaǵında jaylasqan «New-Starland» fermer xojalıǵında da usı maqsette seminar shólkemlestirildi.
Ilajǵa rayondaǵı awıl xojalıǵı kárxanalarınıń hám fermer xojalıqlarınıń basshıları qatnastı.
Seminarda Ózbekstan Respublikası Prezidentiniń 2025-jıl 9-dekabrdegi “Paxtashılıq hám ǵálleshilikte zúráátlilikti arttırıw ushın joqarı nátiyjeli intensiv agrotexnologiyalardı qollanıwdıń qosımsha ilajları haqqında”ǵı qararı haqqında maǵlıwmatlar berilip, qararda belgilengen wazıypalar, awıl xojalıǵında intensiv agrotexnologiyalardı engiziw, paxta hám ǵálle jetistiriwde ónimdarlıqtı arttırıw, sonday-aq, ilimiy-innovaciyalıq qatnaslardı ámeliyatqa engiziw máseleleri dodalandı.
Atap ótilgenindey, qararǵa muwapıq paxta hám ǵálle jetistiriwde aldınǵı sırt el tájiriybeleri tiykarında zamanagóy intensiv agrotexnologiyalardı keńnen engiziw, tarawdı mámleket tárepinen qarjılay qollap-quwatlaw mexanizmlerin bunnan bılay da keńeytiw, sonday-aq, paxta zúráátliligin arttırıwda ilim hám innovaciyalarǵa tiykarlanǵan jańa qatnaslardı qollanıw názerde tutılǵan.
Maqset – 2026-jıl ushın tiykarǵı maqsetli kórsetkishler etip zamanagóy intensiv agrotexnologiyalardı keńnen engiziw nátiyjesinde ónimdarlıqtı paxtashılıqta 50 centnerden joqarılatıw, ǵálleshilikte 100 centnerge jetkeriw, paxta jetistiriletuǵın maydanlarda tolıq 76 sm. keńlikte bir hám eki qatarlı sxemada tuqımlıq shigit egiwdi shólkemlestiriw, sonday-aq, ǵálle egiletuǵın maydanlarda tek ǵana yarovizaciya etilgen tuqımlıq dán egiliwin támiyinlew, ilim jetiskenlikleri hám ustaz-shákirt dástúrlerine tiykarlanǵan jańa sistemanı engiziw arqalı paxtashılıqta ónimdarlıqtı arttırıwdan ibarat.
Ilaj dawamında qatnasıwshılarǵa qarardıń mazmun-mánisi hám orınlaw mexanizmleri boyınsha hár tárepleme túsinikler berilip, qatnasıwshılar ózlerin qızıqtırǵan sorawlarǵa juwap aldı.
Orınlarda bul baǵdardaǵı ilajlar dawam etpekte.

Á.Jiyemuratov,
Qaraqalpaqstan xabar agentligi