Ózbekstan Respublikası Prezidenti Shavkat Mirziyoev Surxandárya wálayatına keldi. Mámleketimiz basshısı saparın, dástúrge bola, Hákim Termiziy mavzoleyin zıyarat etiwden basladı.
Quran oqılıp, xalqımızǵa, elimizge tınıshlıq-abadanlıq tilep, pátiya etildi.
Ulamalar menen bolıp ótken sáwbette islam dininiń rawajlanıwına úlken úles qosqan ullı oyshıl, watanlasımız Hákim Termiziydiń ruwxıy-aǵartıwshılıq miyrasın tereń úyreniw hám watanlaslarımız jáne xalıqaralıq jámiyetshilik arasında keńnen úgit-násiyatlaw haqqında sóz boldı.
Sonday-aq, muqaddes dinimizdiń jaqsılıq hám adamgershilik, miyrim-shápáát sıyaqlı ullı pazıyletlerin, milliy qádiriyatlarımızdı qásterlep-saqlaw hám rawajlandırıw, sol tiykarda jas áwladtı jaqsı ideyalar ruwxında tárbiyalaw, olardıń qálbinde Watanǵa muhabbat hám sadıqlıq sezimin jáne de kúsheytiw zárúr ekenligi atap ótildi.
Keyingi jılları ońlanıp, jáne de abat hám gózzal komplekske aylanǵan bul teberik orında zıyaratshılar ushın barlıq sharayat jaratıldı. Átirap abadanlastırılıp, maqbarada da úlken kólemdegi jumıslar orınlandı. Zamanagóy jaqtılandırıwlar, ısıtıw hám suwıtıw sistemaları ornatıldı. Komplekste mikroklimat jaratıw ushın tórt mıńnan aslam 40 túrdegi kóp jıllıq sayamanlı terek, 20 mıńnan aslam máwsimlik hár qıylı gúller egilgen.
Islam ilimleriniń tafsir, hádis, fiqh, kalom, islam filosofiyası, sufizm tariyxı, sufizm kózqarasları sıyaqlı tarawlarında kóplegen shıǵarmalar jazǵan oyshıl kompleksin abat saqlaw, zıyaratshılar ushın qolaylıqlardı keńeytiw boyınsha tiyisli tapsırmalar berildi.

ÓzA