Nızamshılıqqa muwapıq ayırım kategoriyadaǵı puqaralarǵa múlk salıǵın tólewde jeńillikler belgilengen. Fizikalıq shaxslardıń salıq salınıwshı múlkine olarǵa tiyisli bolǵan turaq jaylar, kvartiralar, dala imaratları, isbilermenlik jumısı hám (yamasa) dáramat alıw ushın mólsherlengen jasaw ushın mólsherlenbegen kóshpes múlk ob]ektleri, qurılısı juwmaqlanbaǵan jasaw ushın mólsherlenbegen obektler hám kóp kvartiralı turaq jaylarǵa úzliksiz baylanıslı bolǵan avtomashina turaq jayları, sonday-aq, basqa imaratlar, obektler hám qurılmalar kiredi.
Ózbekstan Respublikası Salıq kodeksine tiykarlanıp tómendegi puqaralar múlk salıǵınan azat etiledi:
“Ózbekstan Qaharmanı” ataǵı, “Shuhrat” ordeni menen sıylıqlanǵan puqaralar.
Urıs mayıpları hám qatnasıwshıları, sonday-aq sheńberi nızam hújjetleri menen belgilenetuǵın, olarǵa teńlestirilgen shaxslar.
Ózbekstan Respublikasınıń konstituciyalıq dúzimin qorǵaw yamasa áskeriy xızmettiń yamasa ishki isler uyımlarındaǵı hám Ózbekstan Respublikası Milliy gvardiyasındaǵı xızmettiń basqa minnetlemelerin orınlaw waqtında jaralanıwı, kontuziya yamasa mayıp bolıwı aqıbetinde yamasa frontta bolıw menen baylanıslı kesellik aqıbetinde qaytıs bolǵan áskeriy xızmetkerlerdiń hám ishki isler uyımları hám Ózbekstan Respublikası Milliy gvardiyası xızmetkerleriniń ata-anaları hám jesir hayalları (jesir erleri).
Jetim balalar hám ata-ana qaramaǵınan ayırılǵan balalar. Bul jeńillik jetim balalarǵa hám ata-ana qaramaǵınan ayırılǵan balalarǵa mámleket tárepinen ajıratılatuǵın turaq jay ushın olar jigirma úsh jasqa tolǵanǵa shekem ámel etedi.
Tómendegi fizikalıq shaxslardıń múlki bolǵan múlk alpıs kvadrat metr sheńberinde salıq salıwdan azat etiledi.
On hám onnan artıq balaları bar ata-analarınan biri. Bul jeńillik puqaralardıń ózin-ózi basqarıw uyımınıń balalardıń bar ekenligin tastıyıqlawshı maǵlıwmatnaması tiykarında beriledi.
Pensionerler. Bul jeńillik pensiya gúwalıǵı tiykarında beriledi.
I hám II topar mayıplıǵı bolǵan shaxslar. Bul jeńillik pensiya gúwalıǵı yamasa medicinalıq-miynet ekspert komissiyasınıń maǵlıwmatnaması tiykarında beriledi.
Turaq jay fondınıń kóshpes múlk obektlerinde ulıwma quwatlılıǵı 100 kVtqa shekem bolǵan qayta tikleniwshi energiya dereklerinen paydalanıwshı shaxslar ushın salıq summası qayta tikleniwshi energiya derekleri qurılmaları ornatılǵan aydan baslap úsh jıl dawamında, quyash panelleri quwatlılıǵınan 25 procentten kem bolmaǵan quwatlılıqqa iye elektr energiyasın toplaw sisteması bar bolǵan quyash panelleri ornatılǵanda bolsa bul paneller paydalanıwǵa tapsırılǵan aydan baslap on jıl dawamında bazalıq esaplaw muǵdarınıń eki esesinen aspaǵan summaǵa azaytıladı.
Kórsetip ótilgen salıq jeńilliklerine iye bolǵan shaxslar salıq jeńilligin alıwǵa bolǵan huqıqın tastıyıqlawshı hújjetlerdi múlk jaylasqan jerdegi salıq uyımlarına erkin túrde usınadı.

ÓzA