Jáhán bankiniń jańalanǵan metodologiyasına tiykarlanǵan “Hayal-qızlar, biznes hám nızam” indeksiniń 2026-jılǵı esabat nátiyjelerine bola, Ózbekstan óz poziciyasın 43 tekshege jaqsılap, 100 den 82,1 ball menen 190 mámleket arasında 48-orındı iyeledi.
Xalıqaralıq ekspertlerdiń juwmaǵına bola, Ózbekstanda gender teńlik boyınsha huqıqıy kepillikler bekkemlengeni, miynet qatnasıqlarında teńlik normalarınıń engizilgeni, analıq hám ata-analıq dem alısı kepillikleri keńeytilgeni, isbilermen hayal-qızlar ushın teń sharayatlar jaratılǵanı esabınan reytingte eń tez ósip atırǵan mámleketlerden birine aylanǵan.
Esabatta ayrıqsha atap ótiliwinshe, Ózbekstan Evropa hám Oraylıq Aziya regionında mámleketlik satıp alıwlarda gender faktorın esapqa alatuǵın nızamshılıqqa iye bolǵan sanawlı (jámi 3) mámleketlerden biri bolıp esaplanadı.
Sonday-aq, 2023-2025-jıllar aralıǵında isbilermenlik tarawında gender teńligin támiyinleytuǵın jańa reformalardı ámelge asırǵan mámleket sıpatında tán alındı.
Indekske bola, Ózbekstannıń huqıqıy reformalar tarawındaǵı kórsetkishi (82,1 ball) onı dúnyanıń eń aldınǵı mámleketleri qatarına alıp shıqtı. Elimiz hayal-qızlar ushın teń huqıqıy ortalıq jaratıw baǵdarında Braziliya, Túrkiya, Qıtay, Yaponiya, Gruziya, Singapur, Qubla Koreya hám Hindstan sıyaqlı mámleketlerdi artta qaldırdı. Bul abıraylı xalıqaralıq indekste atap ótilgen nátiyje Jańa Ózbekstanda gender teńlikti támiyinlew jolında alıp barılıp atırǵan sistemalı reformalar xalıqaralıq kólemde tán alınǵanın kórsetedi.

N.Usmonova,
ÓzA