2026-jıl 7-fevralda “Ózbekstan Respublikasınıń ayırım nızam hújjetlerine ózgerisler hám qosımshalar kirgiziw haqqında”ǵı nızam kúshke kirdi.
Senattıń Byudjet hám ekonomikalıq máseleler komiteti baslıǵınıń orınbasarı Qobil Tursunov nızamnıń áhmiyetli tárepleri haqqında aytıp berdi:
– Huqıqtı qollanıwda birden-bir ámeliyattı támiyinlewge tosqınlıq etiwshi, korrupciyalıq qáwip-qáterlerdi keltirip shıǵaratuǵın jáne xalıq hám isbilermenlerdiń artıqsha sergizdan bolıwına sebep bolıp atırǵan ayırım normalar jańasha qatnas hám talaplar tiykarında qayta kórip shıǵıldı.
“Ózbekstan Respublikasınıń ayırım nızam hújjetlerine ózgerisler hám qosımshalar kirgiziw haqqında”ǵı nızam menen Ózbekstan Respublikasınıń ayırım nızam hújjetlerin óz-ara muwapıqlastırıwǵa qaratılǵan ózgerisler hám qosımshalar kirgizildi.
Sonıń ishinde, “Licenziyalaw, ruqsat beriw hám xabardar etiw tártip-qaǵıydaları haqqında”ǵı nızamda licenziyanıń ámel etiw múddetin sozǵanı hám ózgertkeni ushın mámleketlik bajı óndiriliwi belgilengen.
Bul normanıń birdey tallanıwın támiyinlew maqsetinde “Mámleketlik bajı haqqında”ǵı nızamǵa licenziyanıń ámel etiw múddetin sozǵanı hám onı ózgertkeni ushın mámleketlik bajını óndiriw haqqında qosımsha kirgizildi.
Maǵlıwmat retinde aytıp ótiw kerek, 2024-jılı 1 mıń 14 licenziyanıń ámel etiw múddeti sozdırılǵan hám 2 mıń 683 licenziya ózgertilgen.
“Akcionerlik jámiyetleri hám akcionerlerdiń huqıqların qorǵaw haqqında”ǵı nızamda jámiyettiń basqa akcionerleri tárepinen satılıp atırǵan akciyalardı úshinshi shaxsqa usınıs etilip atırǵan baha boyınsha hám shártler tiykarında akcionerler yamasa jámiyet jeńillikli huqıq tiykarında (tuwrıdan-tuwrı) satıp alıwı múmkin ekenligi belgilengen.
“Bahalı qaǵazlar bazarı haqqında”ǵı nızamǵa da usı ózgeris kirgizilip, muwapıq emesleri saplastırıldı.
“Jerlew hám jerlew isi haqqında”ǵı nızamǵa da qosımsha kirgizildi. Oǵan bola, endi miynet migraciyasında bolǵan dáwirde qaytıs bolǵan Ózbekstan Respublikası puqaralarınıń denelerin alıp keliwdi shólkemlestiriwge baylanıslı qárejetler nızamshılıqta belgilengen tártipte Ministrler Kabineti janındaǵı Migraciya agentliginiń Migraciya qorınıń qarjıları esabınan ámelge asırıladı.
“Mektepke shekemgi bilimlendiriw hám tárbiya haqqında”ǵı nızamda mektepke shekemgi bilimlendiriw hám tárbiyanıń mámleketlik standartın tastıyıqlaw Ministrler Kabinetiniń wákilligi sıpatında, “Bilimlendiriw haqqında”ǵı nızamda bolsa mámleketlik bilimlendiriw standartları Mektepke shekemgi hám mektep bilimlendiriwi ministrligi jáne Joqarı hám orta arnawlı bilimlendiriw ministrligi tárepinen tastıyıqlanatuǵını atap ótilgen.
Bul muwapıqsızlıq saplastırılıp, “Mektepke shekemgi bilimlendiriw hám tárbiya haqqında”ǵı nızamda mektepke shekemgi bilimlendiriw hám tárbiyanıń mámleketlik standartın tastıyıqlaw Ministrler Kabinetiniń wákilliginen shıǵarılıp, Mektepke shekemgi hám mektep bilimlendiriwi ministrliginiń wákilligine ótkerildi.
Salıq kodeksinde ózin-ózi bánt etken shaxslarǵa pensiya tóleniwi ushın miynet stajın esaplawǵa Bazalıq esaplaw muǵdarınıń keminde bir esesi muǵdarında, “Xalıq bántligi haqqında”ǵı nızamda bolsa bul muǵdar BEMniń yarım esesinen az bolmaǵan muǵdarda etip belgilengen.
Nızam menen sociallıq salıq muǵdarı birdeylestirilip, BEMniń bir esesi etip ózgertildi.
Salıq kodeksine jıyımlardı belgilew nızamshılıq hújjetlerinde emes, tek ǵana Salıq kodeksi hám nızamlarda belgileniwi norması kirgizildi.
Nızam ayırım tarawlarda birden-bir huqıqtı qollanıw ámeliyatın qáliplestiriwge, puqaralardıń huqıqları menen mápleriniń qorǵalıwın támiyinlewge xızmet etedi.

Norgul Abduraimova, ÓzA