Ádette erkekler hayallarǵa qaraǵanda kóbirek kaloriya jemewi kerek pe? Britaniyalı dietolog Betan Krauzdıń pikirinshe, ulıwma alǵanda sonday, biraq bul hámmege birdey qollanılatuǵın qaǵıyda emes.
Bizge belgili, insan organizmi háreketleniwden baslap uyqılawǵa shekemgi barlıq processler ushın energiya sarplaydı. 19 jastan 64 jasqa shekem bolǵan úlkenler ushın sutkalıq ortasha energiya talabı hayallarda shama menen 2 000 kaloriya, erkeklerde bolsa 2 500 kaloriya esaplanadı. Balalar hám óspirimlerde bul kórsetkishler sezilerli ózgeshelenedi, 65-74 jasta kemeyip baradı, 75 jastan keyin bolsa jáne de kemeyedi. Biraq ortasha sanlar barlıq jaǵdaylardı tolıq sáwlelendirmeydi.
Qánigelerdiń pikirinshe, erkeklerdiń kóbirek kaloriyaǵa mútáj bolıwınıń tiykarǵı sebeplerinen biri – olardıń tınıshlıqtaǵı (bazal) zat almasıw dárejesi joqarıraq. Bul tiykarınan dene dúzilisindegi parıqlar menen túsindiriledi: ortasha esapta erkeklerde bulshıq et massası kóbirek, hayallarda bolsa may qatlamı úlesi joqarıraq boladı. Bulshiq et toqıması mayǵa qaraǵanda kóbirek energiya sarplaydı.
Sonday-aq, gormonallıq faktorlar da úlken áhmiyetke iye. Erkeklerde joqarı muǵdarda ushırasatuǵın testosteron gormonı bulshıq et ósiwin qollap-quwatlaydı. Sol sebepli boyı, jası hám salmaǵı birdey, hátteki fizikalıq shınıǵıwları da teń dárejedegi erkek hám hayaldıń kaloriya talabı parıqlanıwı múmkin. Biraq bul baǵdarda individuallıq ayırmashılıqlar da úlken orın tutadı.
Máselen, bulshıq etli hayal hám ortasha dúzilistegi erkekti salıstırǵanda, ayırım jaǵdaylarda hayaldıń tınıshlıqtaǵı kaloriya talabı joqarıraq bolıwı múmkin. Eger ol turaqlı túrde kóbirek fizikalıq shınıǵıwlar islese, bul mútájlik jáne de artadı. Sonıń menen birge, uzaq múddetli qatań dieta organizmniń tiykarǵı energiya jumsalıwın azaytıwı, yaǵnıy zat almasıwı tezligin páseytiwi múmkin.
Sonlıqtan qánigeler jeke kaloriya normasın anıqlawda ulıwma kórsetkishlerge emes, al individuallıq ózgesheliklerge súyeniw maqsetke muwapıq ekenligin atap ótedi. Zárúr jaǵdaylarda isenimli medicinalıq dereklerdiń usınıslarınan paydalanıw kerek.

Qaraqalpaqstan xabar agentligi