Ózbekstan kóplegen mámleketler menen sawda-ekonomikalıq birge islesiwdi keńeytip, iri investiciyalıq joybarlar boyınsha áhmiyetli kelisimlerge erispekte.
Mekke qalasında ótkerilgen “Makkah Halal Forum” sheńberinde Ózbekstan Sawda-sanaat palatası baslıǵınıń birinshi orınbasarı Davronbek Qurbonov Kot-d‘Ivuar Respublikası isbilermen toparları menen sóylesiwler ótkerdi.
Kot-d‘Ivuar tárepi investorlar ushın 300 mıń gektar jer ajıratılǵanın málim etti. Jerler 40 jıl múddetke mámleketlik-jeke menshik sheriklik tiykarında ijaraǵa beriledi. Tiykarǵı baǵdarlar: sharwashılıq, balıqshılıq hám gúrish jetistiriw, delinedi Ózbekstan Sawda-sanaat palatasınıń maǵlıwmatında.
Sonday-aq, mámlekette azıq-awqat sanaatın hadal standartlarına ótkeriw procesi jedellik penen dawam etpekte. Bul bolsa “hadal” mineral tóginler hám agrotexnika importına joqarı talap bar ekenligin ańlatadı hám Ózbekstan ónimleri ushın jańa eksport imkaniyatların ashadı.
Sóylesiwlerde zergerlik buyımların birgelikte islep shıǵarıw, sonday-aq, kakao hám keshyudi qayta islew hám tranzit sawdasın jolǵa qoyıw perspektivaları da kórip shıǵıldı.
Ushırasıw juwmaqlarına bola, bul baǵdarlarda ámeliy birge islesiwdi baslaw boyınsha kelisimge erisildi.

A.RUSTAMOV, ÓzA