Ózbekstan Xalıq demokratiyalıq partiyası Qaraqalpaqstan Respublikalıq Keńesi baslaması menen “Ózbekstan-2030” strategiyasın “Máhálleni rawajlandırıw hám jámiyetti ilgeriletiw jılı”nda ámelge asırıwǵa baylanıslı mámleketlik baǵdarlamanıń mazmun-mánisin partiya elektoratı arasında keńnen úgit-násiyatlaw” atamasında ilaj bolıp ótti.
Onda Ózbekstan Xalıq demokratiyalıq partiyası Qaraqalpaqstan Respublikası Keńesi basshı hám juwaplı xızmetkerleri, partiyanıń qala hám rayonlıq keńesi baslıqları, Xalıq deputatları qala hám rayonlıq Keńesindegi partiya toparı aǵzaları, partiya belsendileri hám ǵalaba xabar qurallarınıń wákilleri qatnastı.
Atap ótilgenindey, “Ózbekstan-2030” strategiyasın “Máhálleni rawajlandırıw hám jámiyetti ilgeriletiw jılı”nda ámelge asırıwǵa baylanıslı mámleketlik baǵdarlama sheńberinde 337 anıq ilaj belgilengen bolıp, 2026-jılı tarawlar kesiminde 59 normativlik-huqıqıy hújjet jáne strategiyalıq áhmiyetke iye 12 ayrıqsha normativlik-huqıqıy hújjet joybarın islep shıǵıw rejelestirilgen.
Mámleketimiz basshısınıń usı jıl 16-fevraldaǵı “Máhálleni rawajlandırıw hám jámiyetti ilgeriletiw jılı”nda áhmiyetli baǵdarlar boyınsha reformalar baǵdarlamaları hám “Ózbekstan – 2030” strategiyasın ámelge asırıw boyınsha mámleketlik baǵdarlama haqqında”ǵı Pármanına muwapıq, máhállelerdi ekonomikalıq, sociallıq hám infrastrukturalıq jaqtan bekkemlew tiykarǵı wazıypa sıpatında belgilendi. Sonıń ishinde, 10 mıńnan aslam óndiris hám xızmet kórsetiw joybarların ámelge asırıw arqalı 100 mıń jańa jumıs ornı jaratıladı, kámbaǵallıq hám jumıssızlıqtan jıraq máhállelerdiń sanı 3,5 mıńǵa jetkeriledi. Máhálleler infrastrukturasın jetilistiriw ushın 20 trillion sum qarjı qaratılıp, máhálledegi mashqalalardı jedel sheshiw hám orınlawdı 24/7 onlayn qadaǵalaw sisteması engiziledi.
Ekonomikalıq reformalar sheńberinde 2026-jılı jalpı ishki ónim kólemin 167 milliard AQSh dollarına jetkeriw, 2030-jılǵa shekem bolsa 240 milliard dollardan arttırıw ushın bekkem tiykar jaratıw názerde tutılmaqta. Ekonomikalıq ósiw páti 6,6 procentke jetkerilip, inflyaciya dárejesi 6-6,5 procentke túsiriledi. Sonday-aq, 1 million puqaranı turaqlı jumıs penen támiyinlew, 263 mıń shańaraqtı kámbaǵallıqtan shıǵarıw arqalı kámbaǵallıq dárejesin 2,8 procentke, jumıssızlıqtı 4,5 procentke túsiriw rejelestirilgen. Ekonomikaǵa 50,4 milliard AQSh dolları muǵdarında sırt el investiciyaların tartıw, xızmetler tarawınıń kólemin 100 milliard dollardan arttırıw, qurılıs jumıslarınıń kólemin 11 procentke arttırıp 30 milliard dollarǵa jetkeriw hám 4 milliard dollarlıq 3,5 mıńnan aslam jańa xızmet kórsetiw obektlerin iske qosıw wazıypaları belgilep berilgen.
Sonıń menen birge, kásip-óner bilimlendiriwi sistemasın rawajlandırıw maqsetinde 2026/2027-oqıw jılınan 7 aymaqta “Kásipler qalashası” shólkemlestiriledi, texnikum oqıwshılarına stipendiya tólew ámeliyatı engiziledi. Aymaqlarda 24 mamanlıqtı bahalaw orayı iske túsirilip, xalıqaralıq standartlar tiykarında sertifikat beriw sisteması jolǵa qoyıladı. Germaniya, Shveycariya, Ullı Britaniya, Qıtay hám Koreya Respublikası tájiriybesi tiykarında jumıs alıp baratuǵın texnikumlardıń sanı 100 ge jetkeriledi.
Sonday-aq, Ekologiyalıq turaqlılıqtı támiyinlew boyınsha aldınǵı texnologiyalardı engiziw arqalı 7 milliard kub metr tábiyǵıy gaz únemlenedi hám atmosferaǵa 11 million tonna zıyanlı zatlardıń shıǵarılıwınıń aldı alınadı. 504 mıń gektar maydanda suwdı únemleytuǵın texnologiyalar engizilip, 5 milliard kub metr suw únemlenedi. 1,3 mıń kilometr kanal hám suwǵarıw tarmaqların betonlaw arqalı jılına qosımsha 500 million kub metr suwdı únemlew támiyinlenedi. 2026/2027-oqıw jılınan hár bir aymaqta 14 “jasıl” texnikum shólkemlestiriledi, sonday-aq, elektromobiller ushın 16 procentke shekem jeńilletilgen kreditler ajıratıw tártibi engiziledi.
Mámleketlik basqarıw hám sud-huqıq sistemasında Oliy Majlis palatalarınıń wákillikleri keńeytilip, sud qadaǵalawı kúsheytiledi, oǵada awır jınayatlar xalıq wákilleriniń qatnasıwında kórip shıǵıladı. Korrupciya, náshebentlik, hayal-qızlar hám balalarǵa zorlıqqa qarsı gúresiw mexanizmleri jetilistiriledi.
Ulıwma alǵanda, qabıl etilgen Mámleketlik baǵdarlama máhálleni rawajlandırıw, ekonomikanı innovaciyalıq jolǵa qoyıw, ekologiyalıq turaqlılıqtı támiyinlew hám xalıqtıń abadanlıǵın arttırıwǵa xızmet etedi jáne reformalar orayında insan mápin joqarı qoyadı.
Ilaj dawamında bir qatar deputatlar hám partiya keńesi wákilleri pikir-usınıslar bildirip, mámleketlik baǵdarlamada belgilengen wazıypalardı xalıq arasında, ásirese partiya elektoratı arasında partiyanıń tiykarǵı buwını esaplanǵan baslanǵısh partiya shólkemlerinde keńnen úgit-násiyat etiw atap ótildi hám orınlarda úgit-násit ilajların shólkemlestiriw wazıypası belgilep alındı.
Ilaj sońında, partiyanıń baǵdarlamalıq maqset hám wazıypaların úgit-násiyatlawda belsendilik kórsetip atırǵan bir qatar rayonlıq partiya keńesleri zamanagóy kompyuter menen sıylıqlandı.

Qaraqalpaqstan xabar agentligi