Hár jılı elimizde 270 mıńǵa shamalas jańa shańaraq payda bolmaqta.
– Jas shańaraqlar ushın eń dáslep ne kerek? Álbette, qolaylı hám ıqsham turaq jay zárúr. Sonı esapqa alıp, jas shańaraqlardı qollap-quwatlaw maqsetinde turaq jay ipoteka baǵdarlaması sheńberinde kredit stavkasınıń 14 procentten artqan bólegi byudjetten qaplap beriledi, – dedi Prezidentimiz.
Málimleme hújimleri háwij alıp atırǵan búgingi kúnde jaslar arasında kitapqumarlıqtı ǵalaba en jaydırıw áhmiyetli wazıypalardan biri bolıp qalatuǵını atap ótildi.
Bul jumıslardı jańa basqıshqa alıp shıǵıw ushın dúzilgen “Kitapqumarlıq mádeniyatın rawajlandırıw” qorı arqalı eń talantlı jazıwshılarǵa dóretiwshilik buyırtpa beriledi hám bir jıl dawamında ayına 20 million sumnan haqı tólenedi.
Eń saylandı shet el ádebiyatların ózbek tiline, milliy ádebiyatlardı shet tillerge awdarıw hám basıp shıǵarıw qárejetiniń yarımı qaplanadı.
Juwapkerlerge jańa oqıw jılına shekem eń jaqsı 100 shıǵarmadan ibarat kitaplar toplamın tayarlap, barlıq mektep hám texnikumlarǵa jetkeriw tapsırıldı. Mekteplerdegi eń belsendi kitapqumar oqıwshılarǵa 10 million sumnan sıylıq beriledi.
Kitapxana, “book cafe” hám kitap dúkanların ashıp, kitap sawdasın ayına 10 mıń danadan asırǵan isbilermenlerge úsh jılǵa 1 milliard sumǵa shekem 7 procentlik ssuda beriw jolǵa qoyıladı.
“Kóksaray” rezidenciyasında Prezident Shavkat Mirziyoevtiń jaslar menen sóylesiwi dawam etpekte.

ÓzA