Bul haqqında Prezident Shavkat Mirziyoevtiń “Kóksaray” rezidenciyasında jaslar menen dawam etip atırǵan sóylesiwinde atap ótildi.
Ótken jılı Kásiplik bilimlendiriw agentligi shólkemlestirilip, hár bir aymaqta hákimlerdiń basshılıǵında Kásiplik bilimlendiriw keńesleri jumıs basladı.
Agentlik hám hákimlerge qaysı texnikumda kásipke oqıtıw baǵdarlamasın qayta kórip shıǵıp, jumıs beriwshilerdiń talabına beyimlestiriw, qaysı birine kásip-óner hám “dual bilimlendiriw” boyınsha eń jaqsı tájiriybelerdi alıp keliw kerek ekenligi hám texnikumlardıń materiallıq-texnikalıq bazasın jaqsılaw boyınsha máselelerdi operativ sheship barıw tapsırıldı.
Hákimler texnikum imaratı hám jerleri basqa maqsetlerde berilmewi, direktorları bolsa jumısına baylanıslı bolmaǵan májiliske shaqırılmawı haqqında eskertildi.
Hár jılı keminde 100 texnikumdı tolıq ońlap, texnologiyalıq hám talap joqarı bolǵan kásiplerge sáykes etip úskenelew maqset etip alındı.
“Dual bilimlendiriw” qamtıp alıwın jáne de keńeytiw áhmiyetli ekenligi atap ótildi. Hár ayda texnikumlarda “Kásiplik rawajlanıw kúni” hám miynet yarmarkaları shólkemlestiriledi. Texnikumlarǵa da joqarı oqıw orınları sıyaqlı “spin-off” ashıwǵa ruqsat beriledi. Onda oqıwshılardıń startap joybarlarına 1 milliard sumǵa shekem ajıratıladı.
Usı jıldan baslap, joqarı oqıw ornı studentleri sıyaqlı texnikum oqıwshıları ushın da “Jumıs isle hám sayaxat et (Work and travel)” baǵdarlaması tiykarında altı ay dawamında sırt elde islep, qosımsha dáramat tabıw imkaniyatı jaratıladı. Onda baǵdarlamada qatnasatuǵın texnikum oqıwshılarına jol haqı qárejetleri ushın ssuda ajıratıladı.

ÓzA