Bul haqqında Prezident Shavkat Mirziyoevtiń “Kóksaray” rezidenciyasında jaslar menen dawam etip atırǵan sóylesiwinde atap ótildi.
Usı jıldan “Keleshek isbilermeni” baǵdarlaması iske qosıladı hám jas isbilermenlerge 7 jıl múddetke 15 procentlik kredit ajıratıw baslanadı.
Atap aytqanda, ózin-ózi bánt etken jaslarǵa girewsiz 20 million sumǵa shekem, isbilermenlik kónlikpesine iye bolıp, óz biznesin baslap atırǵanlarǵa 300 million sumǵa shekem, jumısın keńeytpekshi bolǵan jas isbilermenlerge 2 milliard sumǵa shekem, keminde 5 pitkeriwshini jumısqa alǵan isbilermenlerge bolsa 10 milliard sumǵa shekem kredit beriledi.
Joqarı bilimlendiriw, ilim hám innovaciyalar ministrligi menen birgelikte “Meniń birinshi kásibim” baǵdarlamasın baslaw tapsırıldı. Onda, stajirovka baǵdarlaması tiykarında joqarı oqıw ornı pitkeriwshileri arasında tańlaw ótkerilip, olarǵa ayına 2 million sumǵa shekem stipendiya tólew jolǵa qoyıladı.
Isbilermenlikti endi baslap atırǵan jaslardıń 30 procenti biznes kónlikpesi jetispeytuǵını sebepli qıyınshılıqqa ushırasıp atırǵanı atap ótildi.
Sol sebepli hár bir aymaqta isbilermenlikke oqıtıw, ideyanı bizneske aylandırıw, buxgalteriya, bank, marketing, ishki hám sırtqı bazarlarǵa shıǵıw menen baylanıslı kompleksli xızmetlerdi kórsetetuǵın “Jaslar biznes-inkubatorı” iske qosıladı.
Juwapkerlerge jaslar ushın qolaylı orınlardı belgilep, bıyıl Qaraqalpaqstan, Jizzaq, Namangan, Surxandárya, Xorezm hám Tashkent qalasında, kelesi jılı qalǵan aymaqlarda usınday oraylardı shólkemlestiriw tapsırıldı.

ÓzA