Korrupciya – mámleket hám jámiyet ushın úlken qáwip. Sonlıqtan elimizde barlıq tarawlar qatarında densawlıqtı saqlaw sistemasında da bul illetke qarsı keskin hám mawasasız gúresiw, hár qıylı byurokratiyalıq hám insan faktorı menen baylanıslı jaǵdaylardı saplastırıwǵa qaratılǵan keń kólemli ilajlar ámelge asırılmaqta.
Álbette, jámiyetshiliktiń belsene qatnasıwısız hám watanlaslarımızdıń járdemisiz bul maqset hám sheklerge erisiw, medicinanı korrupciyadan jıraq, tolıq xalıqshıl sistemaǵa aylandırıw qıyın. Sonıń ushın bul baǵdardaǵı háreketlerimizdi birlestiriw hám óz-ara birge islesiwde óz sheshimin kútip turǵan áhmiyetli mashqalalarımızdı iyinles turıp, nátiyjeli sheshiw boyınsha sizlerge múrájat etpekshimen.
Prezidentimiz 2025-jıl 26-dekabrde Oliy Majlis hám xalqımızǵa Múrájatında korrupciya jámiyette isenim ortalıǵın joq etetuǵın qáwip ekenin atap ótip, 2026-jılı oǵan qarsı gúresiwde “ayrıqsha jaǵday” járiyalanatuǵının málim etken edi.
Búgin tarawdaǵı jetiskenlikti – jetiskenlik, kemshilikti – kemshilik, dep aytıp, sistemadaǵı “kesellikler”ge durıs diagnoz qoyıw hám olardıń sheshimin tabıwǵa birgelikte háreket etiwimiz zárúr.
Biraq, tilekke qarsı, elege shekem densawlıqtı saqlaw mákemelerinde korrupciya, byurokratiya, dámegóylik, mápler soqlıǵısıwı sıyaqlı ayırım unamsız jaǵdaylar saqlanıp qalmaqta. Bul bolsa sistemadaǵı reformalardıń nátiyjeliligine zıyan jetkerip, xalqımızdıń medicinaǵa, pidayı qánigelerimizdiń miynetine bolǵan isenimin tómenletpekte.
Áne usı jaǵdaylardan kelip shıǵıp, sistemada korrupciyaǵa qarsı gúresiwdiń zamanagóy mexanizmlerin keńnen engiziwge ayrıqsha itibar qaratpaqtamız. Tarawda ashıq-aydınlıqtı támiyinlew, jámiyetshilik aldında esap beriwdi arttırıw boyınsha zárúr ilajlar kórilmekte.
Atap aytqanda, qısqa waqıt ishinde bir qatar elektron modullerdi ózinde jámlegen Birden-bir medicinalıq málimleme sisteması (DMED) jaratılıp, ámeliyatqa engizilmekte. Taraw basshı-kadrları búgingi kúnniń talaplarınan kelip shıǵıp, zamanagóy menedjment tiykarları boyınsha oqıtılmaqta. Medicina mákemeleri buxgalterleriniń finanslıq bilim hám kónlikpelerin arttırıw boyınsha oqıw kursları shólkemlestirilmekte.
Álbette, bul ele jetkilikli emes. Aldımızda óz sheshimin kútip turǵan mashqalalar, mámleketimiz basshısı aldımızǵa qoyǵan talap hám wazıypalar kóp. Bunı tolıq ámelge asırıw ushın barlıq watanlaslarımız birlesip gúresiwi zárúr.
Óz antına, kásibi hám wazıypasına sadıq, hadal, hújdanı pák Siz, áziz medicina xızmetkerlerin bunnan bılay da medicinanı korrupciyadan jıraq sistemaǵa aylandırıw jolında bar bilim hám tájiriybeńizdi jumsaysız, dep isenemen.
Sonıń menen birge, tarawda korrupciyaǵa qarsı nátiyjeli gúresiwde keń jámiyetshiliktiń járdemi hám qatnasıwı áhmiyetli, dep bilemiz.
Al, ministrliktiń oraylıq apparatı, rayonlıq birlespeleri, sistemalı shólkemler hám mákemeleri xızmetkerleriniń korrupciyalıq háreketlerine gúwa bolsańız yamasa nızamshılıqqa qayshı basqa huqıqbuzarlıq jaǵdaylarına baylanıslılıǵı boyınsha maǵlıwmatqa iye bolsańız, ministrliktiń “1003” qısqa sanlı “Isenim telefonı” hámde https://t.me/qrdsmbot rásmiy telegram bot arqalı óz múrájatıńızdı jollasańız boladı.
Usı jerde, tek ǵana korrupciya jaǵdayların saplastırıw emes, al tarawdı bunnan bılay da jetilistiriwde sizlerdiń pikir-usınıslarıńız biz ushın oǵada áhmiyetli ekenin jáne bir márte esletip ótpekshimen. Sizlerdiń hár bir múrájatıńız Densawlıqtı saqlaw ministrligi tárepinen qısqa múddetlerde kórip shıǵılıp, zárúr ámeliy ilajlar kóriletuǵının málim etemen.

Murat Qurbanov.
Qaraqalpaqstan Respublikası
Densawlıqtı saqlaw ministri.
Qaraqalpaqstan xabar agentligi