Vashington qalasında Xalıqaralıq bilimlendiriw basqarıwshıları awqamınıń (AIEA) abıraylı jıllıq konferenciyası bolıp ótti. Bilimlendiriw tarawındaǵı jetekshilerdi birlestiretuǵın dúnyanıń abıraylı platformalarınan biri esaplanǵan ánjumanǵa “El-yurt umidi” qorınıń wákilleri qatnastı.
“Xalıqaralıq bilimlendiriwdegi turaqsızlıq hám jańa waqıyalar sharayatında jetekshilik” súreni astında ótken ánjuman pútkil dúnyadaǵı universitetler, xalıqaralıq ofisler hám bilimlendiriw shólkemleriniń basshıların bir jerge jámledi.
Júzden aslam sessiya hám dógerek sáwbetleri sheńberinde qatnasıwshılar geosiyasiy faktorlardıń akademiyalıq mobillikke tásiri, globallıq birge islesiw modelleriniń transformaciyası, universitetlerdiń strategiyalıq xalıqaralıq abırayın rawajlandırıw sıyaqlı máselelerdi dodaladı.
Siyasiy hám normativlik ózgerisler sharayatında institucionallıq strategiyalardı qayta kórip shıǵıw, xalıqaralıq bilimlendiriwde beyimlesiwsheń hám isbilermenlik jetekshiligin qáliplestiriw, sonday-aq, akademiyalıq mobillik, birge islesiw hám bilimlendiriw processlerin basqarıwda jasalma intellektten paydalanıw máselelerine ayrıqsha itibar qaratıldı.
Ózbekstandaǵı “El-yurt umidi” qorınıń AIEA ánjumanındaǵı qatnasıwı xalıqaralıq baylanıslardı bekkemlew, jetekshi ekspertler menen tájiriybe almasıw hám sırt el universitetleri menen strategiyalıq sheriklikti keńeytiw perspektivaların dodalaw imkaniyatın berdi.
Atap aytqanda, “El-yurt umidi” qorınıń atqarıwshı direktorı Gulnoza Ismoilova Xalıqaralıq bilimlendiriw institutı (IIE) prezidenti Jeyson CHij benen ótkergen ushırasıw juwmaǵında eki tárepleme túsinisiw memorandumına qol qoyıldı.
Hújjetke bola, Fulbrayt stipendiya baǵdarlaması sheńberinde birgeliktegi bilimlendiriw baǵdarlamasın jolǵa qoyıw hám Ózbekstan hám AQSh universitetleri arasında birgeliktegi diplom baǵdarındaǵı birge islesiwdi qor arqalı ámelge asırıw boyınsha kelisimge erisildi.
Sonıń menen birge, Nyu-York shtatı universitetleri birlespesi (SUNY), Texas Xalıqaralıq bilimlendiriw konsorciumı (TIEC), PeopleCert, QS, IELTS USA hám TOEFL shólkemleriniń wákilleri menen ushırasıwlar ótkerilip, ózbekstanlı jaslar ushın bilim alıw hám kásiplik rawajlanıw imkaniyatların keńeytiw sıyaqlı birge islesiw máseleleri dodalanadı.
Milan politexnika universiteti, Merilend universiteti, Pensilvaniya mámleketlik universiteti, Illinoys universiteti wákilleri menen ótkerilgen sóylesiwler dawamında texnikalıq hám kánshilik tarawlarında kadrlardı tayarlaw, kiberqáwipsizlik, jer resursları, balıqshılıq, awıl xojalıǵı hám suwǵarıw boyınsha oqıw kursların shólkemlestiriw jáne medicina hám qala qurılısı baǵdarlarında birge islesiw imkaniyatları dodalandı.
Qor insan kapitalın bekkemlew boyınsha mámleketlik siyasattıń tiykarǵı baǵdarları sheńberinde Ózbekstannıń globallıq bilimlendiriw mákanına integraciyalasıwı hám xalıqaralıq akademiyalıq baylanıslardı rawajlandırıw baǵdarında sistemalı jumıslardı dawam ettirmekte.

N.Abduraimova, ÓzA