ÓzLiDeP Qaraqalpaqstan Respublikası Jaslar qanatınıń baslaması menen “Isbilermen hám jaslar” ushırasıwı shólkemlestirildi. Bul ilaj “Kreativ jas isbilermen” reklama treningi atamasında ótkerilip, jaslardıń isbilermenlik jumısında zamanagóy marketing hám reklama qurallarınan nátiyjeli paydalanıw kónlikpelerin arttırıwǵa qaratıldı.
Ushırasıwda Nókis qalasındaǵı belgili jas isbilermenlerdiń biri, “Babajanov studio”, “Babajanov Production” hám “Babajanov Print” Tipografiya hám poligrafiya orayınıń tiykarın salıwshısı Rashid Babajanov óz jumısı hám toplaǵan tájiriybesi menen ortaqlastı. Ol zamanagóy reklama usılları, jeke brend jaratıw, qarıydarlar menen islesiw mádeniyatı hám sociallıq tarmaqlarda nátiyjeli kontent tayarlaw boyınsha ámeliy usınıslar berdi.
Ilaj dawamında jumıs alıp barıp atırǵan jas isbilermenler tárepinen islep shıǵarılıp atırǵan ónimler hám kórsetilip atırǵan xızmetlerdi keń jámiyetshilikke jetkeriwde videorolikler hám infografikalar tayarlaw boyınsha ámeliy treningler shólkemlestirildi. Qatnasıwshılar óz biznes joybarları ushın reklama materialların islep shıǵıw hám olardı sociallıq tarmaqlardaǵı postlar arqalı úgit-násiyatlaw kónlikpelerine iye boldı.
Bul ushırasıw jaslardıń kreativ pikirlewin qollap-quwatlaw, olardı zamanagóy isbilermenlik ortalıǵına beyimlestiriw hám básekige shıdamlılıǵın arttırıwǵa xızmet etti. Sonıń menen birge, ilaj jas isbilermenler arasında tájiriybe almasıw hám óz-ara birge islesiw baylanısların bekkemlew ushın nátiyjeli ortalıq boldı.

Qaraqalpaqstan xabar agentligi