“Jańa Ózbekstan” universitetinde Ullı Britaniyanıń dúnyadaǵı eń abıraylı joqarı oqıw orınlarınan biri, xalıqaralıq reytinglerde jetekshi orın iyelep kiyatırǵan Oksford universiteti menen birgelikte shólkemlestirilgen Oxford Hub platformasınıń rásmiy ashılıw máresimi bolıp ótti.
Oksford universiteti sońǵı jılları Times Higher Education World University Rankings reytinginde izbe-iz túrde dúnyanıń birinshi sanlı universiteti sıpatında tán alınıp kelinbekte. Sonday-aq, QS World University Rankings reytinginde de turaqlı túrde eń joqarı tekshelerde atap ótilip kelinbekte.
Bunday abıraylı universitet penen birge islesiw “Jańa Ózbekstan” universitetiniń xalıqaralıq akademiyalıq maydandaǵı abırayın jańa basqıshqa alıp shıǵadı.
Bul joybar tek ǵana Ózbekstan emes, al pútkil Oraylıq Aziya joqarı bilimlendiriw tariyxında áhmiyetli waqıya esaplanadı. “Jańa Ózbekstan” universiteti regionda birinshi bolıp Oksford universiteti menen bunday keń kólemli hám sistemalı akademiyalıq platformanı jolǵa qoymaqta.
Oxford Hub Ózbekstan joqarı bilimlendiriw mákemeleri ushın Oksford universitetiniń jetekshi ilimpazları, qánigeleriniń aldınǵı izertlewlerine rásmiy hám sistemalı tiykarda kiriw imkaniyatın jaratadı. Bul baslama Oksford universiteti quramındaǵı Wolfson kolledji janında jumıs alıp baratuǵın Oxford Birsöz Initiative tárepinen muwapıqlastırıladı hám Ullı Britaniya húkimetiniń járdeminde ámelge asırıladı.
Saltanatlı ilajda mektepke shekemgi hám mektep bilimlendiriwi ministri Ezoza Karimova keyingi jıllarda bilimlendiriw tarawında aldıńǵı baslamalar alǵa qoyılıp atırǵanın atap ótti. Bul baslamalar bilimlendiriwdegi xalıqaralıq birge islesiwdiń barǵan sayın keńeyip barıwında áhmiyetli faktor bolıp atırǵanı itibarǵa ılayıq. Atap ótilgenindey, “Jańa Ózbekstan” universiteti hám Oksford universiteti arasında Oxford Hub’tıń shólkemlestiriliwi jasalma intellekt, injenerlik, aldıńǵı texnologiyalar hám ilimniń túrli baǵdarlarında elimiz hám britaniyalı qánigeler, ilimpazlar arasında keńnen birge islesiwge, jańa ilimiy izertlewlerge tiykar boladı.
— Bul platformanıń iske qosılıwı akademiyalıq birge islesiw, professorlar almasıwı, ilimiy izertlewlerde de ayrıqsha áhmiyetke iye, – dedi mektepke shekemgi hám mektep bilimlendiriwi ministri Ezoza Karimova.
Saltanatlı ilajda Ullı Britaniyanıń Oraylıq Aziya hám Ázerbayjan boyınsha sawda wákili lord Jon Olderdaysqa “Jańa Ózbekstan” universitetiniń “Húrmetli professorı” ataǵı tapsırıldı.
– Ózbekstanda bilimlendiriw tarawında úlken ózgerisler júz bermekte, – dedi Ullı Britaniyanıń Oraylıq Aziya hám Ázerbayjan boyınsha sawda wákili lord Jon Olderdays. – Bul ózgerisler mámlekettiń rawajlanıwına xızmet etetuǵını sózsiz.
Haqıyqatında da, mámleketimiz hám dúnyanıń eń abıraylı joqarı oqıw orınları arasındaǵı birge islesiwdiń kúsheyiwi bilimlendiriwdiń sapasın bunnan bılay da jetilistiriwge xızmet etedi.

Nazokat Usmonova, ÓzAnıń xabarshısı