Múnásibet
Prezident Shavkat Mirziyoevtiń AQShqa ámeliy saparı eki mámleket arasındaǵı strategiyalıq sheriklik qatnasıqların bunnan bılay da bekkemlew jolındaǵı áhmiyetli qádem boldı.
Ózbekstan Respublikası Oliy Majlisi Senatınıń Xalıqaralıq qatnasıqlar, sırtqı ekonomikalıq baylanıslar, sırt el investiciyaları hám turizm máseleleri komiteti baslıǵınıń orınbasarı Odiljon MAMATKARIMOV bul haqqında múnásibet bildirdi:
– Ózbekstan keyingi jılları tınıshlıq súyer, ashıq hám teń salmaqlı sırtqı siyasat júrgizip, xalıqaralıq maydanda isenimli hám juwapkershilikli sherik sıpatında óz abırayın bekkemlep barmaqta.
Mámleketimiz tárepinen regionallıq turaqlılıqtı támiyinlew, globallıq mashqalalardı sóylesiw hám birge islesiw jolı menen sheshiw, ekonomikalıq baylanıslardı keńeytiwge qaratılǵan izbe-iz is-háreketler dúnya jámiyetshiligi tárepinen unamlı bahalanbaqta.
Ásirese, Amerika Qurama Shtatları menen óz-ara paydalı birge islesiw keyingi jıllarda sapa jaǵınan jańa basqıshqa kóterilip, sawda-ekonomikalıq, investiciyalıq, bilimlendiriw hám innovaciya tarawlarında izbe-iz keńeyip barmaqta.
Prezidentimiz Shavkat Mirziyoevtiń AQShqa ámeliy saparı mine usı processlerdiń logikalıq dawamı boldı. Vashington qalasında ótkerilgen ushırasıw hám sóylesiwler mámleketimiz sırtqı siyasatınıń ámeliy nátiyjelerge qaratılǵanın jáne bir márte kórsetti.
Mámleketimiz basshısı Tınıshlıq keńesiniń dáslepki májilisinde shıǵıp sóylep, Gaza sektorın sociallıq-ekonomikalıq jaqtan tiklew hám regionda turaqlılıqtı támiyinlew boyınsha óz kózqarasların alǵa qoydı.
Bul baslama Ózbekstannıń xalıqaralıq maydanda belsendi, juwapkershilikli hám tınıshlıqtı súyetuǵın mámleket sıpatındaǵı abırayın jáne de bekkemlewge xızmet etedi. Mámleketimiz tek ǵana regionallıq emes, al globallıq kólemdegi mashqalalarǵa biypárwa emesligin, olardı qarım-qatnas hám birge islesiw arqalı sheshiw tárepdarı ekenin ámeliy usınıslar menen kórsetpekte.
Gaza sektorın sociallıq-ekonomikalıq tiklew máselesinde bildirilgen poziciya Ózbekstannıń insanıylıq principlerine sadıqlıǵın, turaqlılıq hám rawajlanıwdı támiyinlewdi tiykarǵı wazıypa sıpatında kóretuǵının dálilledi. Bul bolsa mámleketimizdi xalıqaralıq qatnasıqlarda isenimli, konstruktivlik hám intaker sherik sıpatında jáne de bekkem poziciyaǵa alıp shıǵadı.
Sapar etiw sheńberinde Prezidentimiz AQSh sawda ministri, sawda wákili, Eksimbank basshılıǵı hám Xalıqaralıq finanslıq rawajlanıw korporaciyasınıń bas atqarıwshı direktorı menen hár tárepleme hám mazmunlı ushırasıwlar ótkerip, eki mámleket arasındaǵı ekonomikalıq birge islesiwdi bunnan bılay da keńeytiwge qaratılǵan tiykarǵı máselelerdi dodaladı.
Sóylesiwler waqtında óz-ara sawda kólemin arttırıw, investiciyalıq baylanıslardı jedellestiriw, strategiyalıq joybarlardı birgelikte qarjılandırıw mexanizmlerin jetilistiriw, sanaat, energetika, infrastruktura hám joqarı texnologiyalar tarawlarında jańa baslamalardı alǵa qoyıw máselelerine ayrıqsha itibar qaratıldı.
Aldınǵı innovaciyalıq sheshimler hám zamanagóy basqarıw tájiriybesin Ózbekstan ekonomikasına tartıw, jeke menshik sektor arasındaǵı sheriklikti bekkemlew jáne qarjı institutlarınıń qatnasın keńeytiw boyınsha ámeliy kelisimlerge erisiw máseleleri kórip shıǵıldı.
Áne usı sóylesiwlerdiń logikalıq dawamı sıpatında AQSh qarjı institutları hám iri kompaniyaları menen birge islesiwdi tereńlestiriw boyınsha anıq baǵdarlar belgilep alındı. Bul bolsa, Ózbekstan ekonomikasın modernizaciyalaw, joqarı qosımsha qun jaratatuǵın jańa óndirislik quwatlıqlardı qurıw, aldınǵı texnologiyalardı engiziw hám eksport geografiyasın keńeytiwge xızmet etedi.
Sapar etiw sheńberinde eki tárepleme hújjetlerge qol qoyılǵanı hám birgeliktegi joybarlardıń prezentaciyası ótkerilgeni bolsa ekonomikalıq sherikliktiń sózde emes, al ámelde bekkemlenip atırǵanı, Ózbekstan-AQSh qatnasıqları ámeliy nátiyjeler basqıshına ótip atırǵanın ayqın kórsetti.

Juwmaqlap aytqanda, bul ámeliy sapar Ózbekstannıń globallıq ekonomikalıq hám siyasiy processlerdegi qatnasın jáne de jedellestiriw, xalıqaralıq maydandaǵı abırayın bekkemlew jáne strategiyalıq sherikler menen óz-ara paydalı baylanıslardı tereńlestiriw jolında áhmiyetli basqısh boldı.
Erisilgen kelisim hám baslamalar mámleket ekonomikasına jańa investiciyalar hám aldınǵı texnologiyalardı tartıw, sanaattı modernizaciyalaw, eksport potencialın arttırıw jáne joqarı qosımsha qun jaratatuǵın tarmaqlardı rawajlandırıwǵa xızmet etedi.
Sonıń menen birge, bul sapar etiw Ózbekstannıń tınıshlıqtı súyiwshi hám konstruktivlik sırtqı siyasat júrgizip atırǵan, globallıq mashqalalarǵa sheshim usınıs ete alatuǵın belsendi mámleket sıpatındaǵı ornın jáne de bekkemledi.

ÓzAnıń xabarshısı
Norgul ABDURIMOVA.
jazıp aldı.