Ózbekstan Respublikası Oliy Majlisi delegaciyası Vena qalasında bolıp ótken EQBSh Parlament Assambleyasınıń qısqı sessiyasında qatnastı. Bul haqqında parlament tómengi palatasınıń Baspasóz xızmeti xabar berdi.
Sessiya sheńberinde Ózbekstan delegaciyası aǵzaları tárepinen mámleketimizde “Ózbekstan – 2030” strategiyası sheńberinde alıp barılıp atırǵan sistemalı reformalar, jasıl ekonomikaǵa ótiw processleri, ekologiyalıq turaqlılıqtı támiyinlew hám puqaralardıń sociallıq máplerin qorǵaw baǵdarında ámelge asırılıp atırǵan keń kólemli reformalar haqqında tolıq maǵlıwmat berildi.
Sonday-aq, ilim hám bilimlendiriw tarawın rawajlandırıw, innovaciyalardı keńnen engiziw, ekonomika tarmaqlarına zamanagóy ilimiy-texnologiyalıq jetiskenliklerdi engiziw, klimat ózgeriwine qarsı gúresiw boyınsha alıp barılıp atırǵan ámeliy ilajlarǵa da toqtap ótildi.
Sapar etiw sheńberinde bir qatar eki tárepleme ushırasıwlar da ótkerildi. Sonıń ishinde, Avstriya parlamenti administraciyası, AQSh Kongressi Senatınıń wákilleri, Shveciya parlamentiniń aǵzaları, EQBSh Parlament Assambleyası hám Túrkiy mámleketler shólkemi Parlament Assambleyasınıń bas xatkerleri hám basqa da rásmiy delegaciyalar menen nátiyjeli sóylesiwler bolıp ótti.
Ushırasıwlar dawamında parlamentleraralıq birge islesiwdi bunnan bılay da bekkemlew, óz-ara paydalı baslamalardı keńeytiw, sonday-aq, bar baylanıslardı jańa basqıshqa alıp shıǵıw máseleleri boyınsha hár tárepleme pikir alısıldı.

M.Komilova,
ÓzA