Ózbekstan aymaqlarında isbilermenlik belsendiliginiń tiykarǵı kórsetkishleri boyınsha kompleksli monitoring barlıq áhmiyetli normalar kesiminde ósim baqlanǵanın kórsetpekte.
Bıyılǵı jıl yanvar ayınıń juwmaqlarına bola, salıq túsimleri ótken jıldıń usı dáwirine salıstırǵanda 39,2 procentke ósip, turaqlı unamlı dinamikanı kórsetti.
Túsimlerdiń ósiminiń eń joqarı kórsetkishleri Sırdárya, Nawayı, Xorezm hám Qashqadárya wálayatlarında baqlandı. Bul aymaqlarda ósim pátleri ortasha derlik 49 procentti quradı.
Fizikalıq shaxslardıń dáramat salıǵı túsimleri 15,1 procentke, múlk salıǵı túsimleri 19,6 procentke hám jer salıǵı túsimleri 20,3 procentke arttı.
Bajıxana tólemleri jıllıq esapta 19,8 procentke ósti. Eń joqarı ósim pátleri Nawayı, Jizzaq hám Namangan wálayatlarında tuwra keldi hám ortasha derlik 67 procentti quradı.
Sonday-aq, Samarqand wálayatı hám Qaraqalpaqstan Respublikasında da turaqlı unamlı dinamika baqlanıp, túsimler ortasha 31 procentke arttı.
Sırtqı ekonomikalıq kórsetkishlerdi tallaw juwmaqlarına bola, tovarlar eksportı 19,5 procentke arttı. Eksport kóleminiń eń joqarı ósimi Tashkent hám Nawayı wálayatlarında baqlandı hám ortasha 47 procentti quradı.
Sonıń menen birge, kreditlew kóleminde de sezilerli ósim baqlandı. Kórip shıǵılıp atırǵan dáwirde kommerciyalıq bankler tárepinen ajıratılǵan kreditler kólemi 2,7 procentke kóbeydi. Eń joqarı ósim Samarqand, Buxara hám Xorezm wálayatlarına tuwra kelip, ortasha 58 procentti quradı.
Jeke menshik sektordıń jedel rawajlanıwı jańa xojalıq júrgiziwshi subektler sanınıń sezilerli dárejede artqanı menen de tastıyıqlanbaqta. 2026-jıl yanvar ayında 7 116 jańa kárxana dizimnen ótkerildi. Jańa isbilermenlik subektleriniń eń kóp bólegi Tashkent qalasında (1 712) dizimge alındı. Aymaqlar arasında bolsa Tashkent wálayatı (735), Samarqand wálayatı (610) hám Xorezm wálayatı (550) jetekshilik etti.
Ózbekstan Respublikalıq tovar-shiyki zat birjasında dúzilgen kelisimlerdiń kólemi 1,8 esege arttı. Birja belsendiligi mámlekettiń kópshilik aymaqlarında óskeni baqlandı. Ásirese, Sırdárya wálayatında belsendilik 11,1 esege arttı. Sonday-aq, Xorezm, Surxandárya, Buxara, Jizzaq hám Qashqadárya wálayatlarında da ósim baqlanıp, ortasha 6,5 eseni quradı.

Mohigul Qosimova, ÓzA