Bıyılǵı jılı óz aldına futbol boyınsha Ózbekstan Super-ligasına shıǵıwdı maqset etken Nókistiń «Aral» klubı házirgi waqıtta Tashkent qalasında jańa máwsimge basqa komandalar menen joldaslıq oyın ótkeriw arqalı puqta tayarlıqlar kórmekte.
Atap aytqanda, komandamız 19-fevral kúni kóp jıllardan berli Super-ligada oynap kiyatırǵan Mubarektiń «Mashal», 21-fevral kúni Pro-ligada jeńimpazlıq ushın tiykarǵı dawager Bekabadtıń «Metallurg», 22-fevral kúni Tájikstan joqarǵı ligasınıń wákili «Esxata» komandaları menen óz-ara joldaslıq oyın ótkerdi.
«Mashal»ǵa qarsı ótkerilgen oyında 3:0 esabında jeńiske erisken Naǵmetulla Qutıbaevtıń shákirtleri, «Metallurg» penen bolǵan ushırasıwda teńbe-teń oynadı. Esap 3:3.
Tájikstan joqarǵı ligasınıń wákili «Esxata» klubı menen ótkerilgen oyında da komandamız aǵzaları ózleriniń sheberliklerin kórsetip, 2:0 esabında jeńiske eristi.
Házirgi waqıtta oqıw-shınıǵıw jıyını dawam etpekte.

Adilbay Orazov,
Qaraqalpaqstan xabar agentligi sholıwshısı