Ózbekstan Respublikası Oraylıq bankinde kóshpes múlk hám avtotransport quralları aldı-sattı shártnamaların notarial tastıyıqlawda esap-sanaqlardı naq pulsız túrde ámelge asırıwdı engiziw máselesine baǵıshlanǵan ushırasıw bolıp ótti.
Bul tártip Ózbekstan Respublikası Prezidentiniń 2025-jıl 10-dekabrdegi PP-246-sanlı Pármanına muwapıq 2026-jıl 1-aprelden baslap ámeliyatqa engiziledi.
Ushırasıwda Oraylıq bank Baslıǵınıń birinshi orınbasarı N.Saidullaev, Ádillik ministriniń orınbasarı M.Ikramov, Ózbekstan Notarial palatasınıń baslıǵı D.Ashurov, sonday-aq, Ádillik ministrligi, Oraylıq bank, kommerciyalıq banklerdiń wákilleri hám ámeldegi notariuslar qatnastı.
Dodalawlar dawamında xalıq hám isbilermenlik subektlerine operativ hám sapalı xızmet kórsetiw, notarial uyımlar hám banklerdiń úzliksiz jumısın támiyinlew, esap-sanaqlardı ápiwayı, túsinikli hám qáwipsiz túrde shólkemlestiriw, sonday-aq, elektron málimleme sistemaların óz-ara integraciyalawǵa baylanıslı máseleler hár tárepleme kórip shıǵıldı.
Atap ótilgen ilajlar esap-sanaqlardıń isenimliligin arttırıw, aldawshılıq jaǵdaylarınıń aldın alıw, finanslıq operaciyalardıń ashıq-aydınlıǵın támiyinlew hám jasırın ekonomikanı qısqartıwǵa xızmet etetuǵını atap ótildi.
Ushırasıw juwmaǵında juwapker uyımlar tárepinen ámelge asırılıwı kerek bolǵan anıq wazıypalar belgilep alındı.

ÓzA