Qaraqalpaqstan Respublikası Ádillik ministrliginde Ózbekstan Respublikası Prezidentiniń 2026-jıl 5-yanvardaǵı «Respublika máhállerinde qáwipsiz ortalıq jaratıw baǵdarında birden-bir mánzilli islew sistemasın engiziwge qaratılǵan qosımsha ilajlar haqqında»ǵı PQ-1-sanlı qararınıń orınlanıwın támiyinlew maqsetinde ushırasıw ótkerildi.
Ilajda Qaraqalpaqstan Respublikası Ádillik ministri E.Tursunov, Respublika Ministrler Keńesiniń sekretariatı baslıǵı B.Aytımbetova, Qaraqalpaqstan Respublikası sudı sudyası M.Dawmenova, Qaraqalpaqstan Respublikası Prokuraturası bólim prokurorı L.Seytova, Ishki isler ministrliginiń hayal-qızlar hám jaslar menen islesiw bóliminiń baslıǵı X.Reymqulova hám Shańaraq hám hayal-qızlar komitetiniń juwapker xızmetkerleri tárepinen dawlı shańaraqlardı jarastırıw, ajırasıwlardıń, jaqın tuwısqanlar arasındaǵı neke hám erte nekeniń aldın alıw máseleleri boyınsha maǵlıwmatlar berildi.
Sonday-aq, ótkerilgen ilaj dawamında puqaralar ushın kóshpeli qabıllaw ótkerilip, onda puqaralardıń túrli huqıqıy máseleleri boyınsha múrájatları tıńlandı hám olarǵa tiyisli huqıqıy túsinikler berildi. Al, ayırım mashqalalardıń sheshimi boyınsha ámeldegi nızamshılıq tiykarında ornında ilajlar kórildi.

Adilbay Orazov,
Qaraqalpaqstan xabar agentligi sholıwshısı