Ózbekstan Respublikası Prezidentiniń Múrájatında atap ótilgen wazıypaǵa muwapıq, “Ózbekstan – 2030” strategiyasınıń jetilistirilgen joybarı regulation.gov.uz hám uzbekistan2030.uz veb-saytlarında jámiyetshiliktiń dodalawına qoyılǵan edi.
30-dekabrden 28-yanvarǵa shekem, bir ay dawamında xalqımızdan 3 mıń 564 pikir hám usınıslar kelip tústi. Sonnan 2 mıń 153 i tiykarlanǵan usınıs, 751 i tákirarlanatuǵın, 340 ı maqullaw mánisindegi pikirler, 320 sı sın hám narazılıqlardan ibarat.
Ádillik ministrligi hám “Rawajlanıw strategiyası” orayı tárepinen xalıqtıń pikir-usınısları hár kúni jıynalıp, tarawlar boyınsha bólistirildi. Barlıq usınıslar Strategiyalıq rawajlanıw hám reformalar agentliginde hár tárepleme kórip shıǵıldı.
2026-jıl 16-fevral kúni Ózbekstan Respublikası Prezidentiniń “Mámleketti rawajlandırıwdıń 2030-jılǵa shekem mólsherlengen tiykarǵı baǵdarları sheńberinde reformalardı izbe-iz dawam ettiriw hám jańa basqıshqa alıp shıǵıwdıń qosımsha ilajları haqqında”ǵı pármanına qol qoyıldı. Usı párman menen 2026-2030-jıllarǵa mólsherlengen “Ózbekstan – 2030” strategiyası tastıyıqlandı.
Mámleketlik siyasat hám basqarıw akademiyasında “Rawajlanıw strategiyası” orayı hám Strategiyalıq rawajlanıw hám reformalar agentligi menen birgelikte jańa redakciyada qabıl etilgen “Ózbekstan – 2030” strategiyası: ótkerilgen jámiyetshilik dodalawları, bildirilgen usınıslar hám Strategiyaǵa kirgizilgen ózgerisler, kútilip atırǵan nátiyjeler boyınsha baspasóz ánjumanı bolıp ótpekte.
Onda shıǵıp sóylegen “Rawajlanıw strategiyası” orayınıń direktorı Eldor Tulyakov bul hújjettiń áhmiyetine toqtap ótti:
– Jámiyetlik pikirdi úyreniw boyınsha úlken kólemde jumıs alıp barıldı. Ádillik ministrligi hám “Rawajlanıw strategiyası” orayı tárepinen xalıqtıń pikir-usınısları hár kúni jıynalıp, tarawlar boyınsha bólistirildi. Barlıq usınıslar Strategiyalıq rawajlanıw hám reformalar agentliginde hár tárepleme kórip shıǵıldı.
Úyreniw nátiyjeleri boyınsha jámiyetshiligimiz jibergen 2 mıń 153 tiykarlanǵan usınıs olar tiyisli bolǵan ministrlikler hám uyımlardıń juwapkerleri menen dodalandı. Mámleketimiz ushın áhmiyetli esaplanǵan hám orınlaw múmkin bolǵan real usınıslar inabatqa alındı. Olar qánigeler menen qayta islenip, anıq KPIlarǵa aylandırıldı.
Eń kóp usınıs túsken tarawlar bolsa bilimlendiriw – oqıwshı orınları, pedagoglardıń miynet haqısı, bilimlendiriwdiń sapası, ekologiya – ekologiyalıq minez-qulıq, qalalardaǵı jasıllıq, geobotanikalıq izertlewler, sanlastırıw – xızmetler, bilimlendiriw hám medicina, energetika – qayta tiklenetuǵın energiya, gaz hám elektr támiynatı, transport – qalalararalıq qatnawlar, logistika hám qoymaxanalar, jámiyetlik transport.
Ilajda ǴXQ wákillerin qızıqtırǵan sorawlarına juwap berilmekte.

Abdulaziz RUSTAMOV, ÓzA