Nókis qalasında jaslardıń dúnyaǵa degen kózqarasın ele de keńeytiw, ruwxıy-aǵartıwshılıq bilimlerin bekkemlew hám erkin pikirlew kónlikpelerin rawajlandırıw maqsetinde, respublikamızda jaylasqan joqarı oqıw orınları studentleri arasında «Maǵrifat maydanı» tańlawı bolıp ótti.
Tańlaw dawamında studentlerdiń kitapqumarlıq mádeniyatı, tariyx hám ádebiyatqa baylanıslı bilimleri, analitikalıq pikirlewi hám jámáátlik birge islesiw qábiletleri sınaqtan ótkerildi.
Oǵada qızıqlı ótken tańlaw juwmaǵında, Ájiniyaz atındaǵı Nókis mámleketlik pedagogikalıq institutı komandası birinshi orındı jeńip alıwǵa miyasar boldı.
Al, sıylı ekinshi orındı Qaraqalpaqstan Medicina institutı hám Berdaq atındaǵı Qaraqalpaq mámleketlik universitetiniń studentleri iyelegen bolsa, Samarqand mámleketlik veterinariya medicinası, sharwashılıq hám biotexnologiyalar universiteti Nókis filialı jaslarına úshinshi orın nesip etti.
Ótkerilgen bul tańlaw ruwxıy dúnyası bay hám tereń bilimge iye jaslar jámiyetmiz rawajlanıwınıń tiykarı ekenligin jáne bir márte kórsetti.

Adilbay Orazov,
Qaraqalpaqstan xabar agentligi sholıwshısı