Kegeyli rayonı prokurorı I.Abdullaevtıń baslaması menen jumıssız puqaralardıń bántligin támiyinlew maqsetinde, Gújim terek mákan puqaralar jıyını aymaǵınan qusshılıq baǵdarı boyınsha kooperaciya shólkemlestirilip, usı aymaqta jasawshı rayondaǵı kámbaǵal shańaraqlar reestrinde turǵan 20 jumıssız hayal-qız kooperaciya aǵzası quramına kirgizildi.
Sońınan, Ózbekstan Respublikası Ministrler Kabinetiniń “Kámbaǵallıqtı qısqartıw mámleketlik maqsetli qorınıń jumısın shólkemlestiriw ilajları haqqında”ǵı 158-sanlı qararı tiykarında ajıratılǵan 83 mln. sumlıq subsidiya qarjıları esabınan usı hayal-qızlardıń hár birine birewden inkubator, 100 máyek hám basqa da kerekli ásbap-úskeneler hám 200 bas tawıq jetkerip berilip, olardıń jumıs penen bántligi támiyinlendi.
– Mine búgin bizlerge subsiyadiya tiykarında zamanagóy inkubator, 10 bas tawıq hám 100 máyek berilmekte, – deydi kooperaciya aǵzası Gúlzar Temirxanova. – Bunıń ushın elimiz Prezidenti hám rayon prokuraturasına úlken raxmet aytaman. Aldaǵı waqıtları ózlerimizge berilgen bul imkaniyattan nátiyjeli paydalanıp, shańaraǵımızǵa dáramat tabıw ushın háreket etemiz.
Rayondaǵı juwapker shólkem basshılarınıń atap ótiwinshe, aldaǵı waqıtları da bunday kooperaciyalar rayonnıń basqa aymaqlarında da shólkemlestirip, kámbaǵal shańaraqlardıń bántligin támiyinlewge qaratılǵan ilajlar dawam ettiriledi.

Qaraqalpaqstan xabar agentligi