Jınayat isleri boyınsha Bozataw rayonı sudınıń tergew sudyası K.Qıpshaqbaev basshılıǵında rayon prokuraturası, ishki isler bólimi hám tiyisli taraw wákilleriniń qatnasıwında ámeliy seminar shólkemlestirildi.
Seminardı ótkeriwden tiykarǵı maqset jınayat isleri boyınsha tergew hám sorastırıwdıń sapasın ele de nátiyjeliligin arttırıw, tergew, sorastırıw hám sud processlerinde ámeldegi Konstituciya hám nızamshılıq normaların durıs hám anıq qollanıw máselelerin dodalawdan ibarat boldı. Sonday-aq, hákimshilik huqıqbuzarlıq haqqındaǵı bayannamalardı rásmiylestiriw hám onı jiberiw tártibi, is materialların qaytarıw tiykarları, hákimshilik jaza qollanıw múddetleri hám adamlardıń huqıqları menen nızamlı máplerin isenimli qorǵaw máseleleri boyınsha hár tárepleme túsinikler berildi.
Ilaj dawamında ámeliyatta ushırasıp atırǵan ayırım mashqalalı tárepler hám processual kemshilikler de tallanıp, olardıń aldın alıw, huqıqtı qollanıwda birden-bir qatnastı qáliplestiriw boyınsha anıq usınıslar bildirildi.
Usılar menen bir qatarda nızam hújjetlerine kirgizilip atırǵan ózgerisler menen qosımshalardıń áhmiyeti taraw xızmetkerleri itibarınan shette qalmadı.
Seminar juwmaǵında ámeliyatqa baylanıslı sorawlarǵa qánigeler tárepinen tiyisli juwaplar berildi. Ilajda atap ótilgenindey, bunday ámeliy ilajlar huqıq qorǵaw uyımları arasındaǵı óz-ara birge islesiwdi bunnan bılay da kúsheytiw, hákimshilik hám jınayıy islerdi kórip shıǵıwda nızam ústinligin támiyinlewge xızmet etedi.

Qaraqalpaqstan xabar agentligi