Qádirli watanlaslar!
Bárinen burın, siz, ázizlerdi, pútkil xalqımızdı elimizge miyrim-shápáát, qayır-saqawat hám shúkirshilik tımsalı bolǵan muqaddes Ramazan ayınıń kirip keliwi menen shın kewlimnen qızǵın qutlıqlayman.
Álbette, bul qutlı áyyyamda bárshemizdi Ramazanǵa mine usınday saw-salamat, birlik hám awızbirshilikte jetkergeni ushın Jaratqanǵa sheksiz shúkirshilik aytamız.
Elimizdiń sociallıq-ruwxıy turmısında ayrıqsha orın iyeleytuǵın, insandı iygilikli hám sawaplı islerge shaqıratuǵın bul aydı múnásip túrde ótkeriw maqsetinde bıyıl da mámleketimizde úlken tayarlıq jumısları ámelge asırılmaqta. Sonıń ishinde, máhálle hám turaq jaylar, meshit hám medreselerdi abat etiwge, kekseler, mayıp hám járdemge mútáj shaxslardıń halınan xabar alıwǵa, qońsılar, jaqın tuwısqanlarǵa mehir hám itibar kórsetiwge, ibadat hám iftar máresimlerin tártipli ótkeriwge shańaraq hám máhálle xalqı, jámiyetshilik wákilleri tárepinen ayrıqsha áhmiyet berilmekte.
Bulardıń barlıǵı biybaha baylıǵımız bolǵan tınıshlıq-tatıwlıq, milletleraralıq tatıwlıq hám diniy keńpeyillik ortalıǵın, insanıylıq principlerin bekkemlew, elimizdiń rawajlanıwın, xalqımızdıń abadanlıǵın arttırıwǵa xızmet etetuǵını tábiyǵıy, álbette.
Ramazan ayınıń ullı pazıyletleri, ádep-ikramlılıq-ruwxıy áhmiyeti mine, usınday ullı islerde ayqın kórinedi, desek, haqıyqattı aytqan bolamız.
Bul haqqında sóz etkende, keyingi jılları insan qádirin, hár bir puqaranıń huqıqları menen nızamlı máplerin támiyinlew, sociallıq ádillik Ózbekstanda mámleketlik siyasat dárejesine kóterilgeni, usı tiykarda ámelge asırıp atırǵan keń kólemli reformalarımız xalqımızdıń turmısın pútkilley ózgertip atırǵanın atap ótiw orınlı.
Bıyılǵı jıldı mámleketimizde “Máhállelerdi rawajlandırıw hám jámiyetti rawajlandırıw jılı” dep járiyalaǵanımız hám bul baǵdarda tiyisli ámeliy jumıslardı baslap jibergenimizdiń tiykarında da mine usınday ullı umtılıslar jámlengen.
Jámiyetti rawajlandırıw tiykarı máhálle bolıp esaplanadı. Sebebi máhállede ósiw hám ózgeris bolsa, pútkil jámiyet rawajlanadı. Máhállelerimizdiń jetiskenligi hám abadanlıǵı aqır-sońında pútkil jámiyettiń jetiskenligi hám abadanlıǵı sıpatında kórinedi.
Áziz doslar!
Qutlı jerimizge Alla taalanıń miyrimi jawıp turǵan mine, usınday baxıtlı kúnlerde ata-babalarımızdıń esteligin, olardıń iygilikli isleri, sawaplı ámellerin eslew hám dawam ettiriw bárshemiz ushın hám qarız, hám parız bolıp tabıladı.
Sońǵı jılları elimizde islam dini hám mádeniyatınıń rawajlanıwına sheksiz úles qosqan ullı oyshıllarımızdıń muqaddes zıyarat orınların abat etiw, ilimiy miyrasın tiklew hám úyreniw, xalqımız, ásirese, jaslarımız arasında úgit-násiyatlaw boyınsha kóplegen jumıslardı ámelge asırıp atırǵanımız sizlerge jaqsı belgili, álbette.
Ullı ata-babalarımızdıń dańqlı dástúrlerine sadıqlıq penen jasap kiyatırǵan xalqımızdıń kúsh-ǵayratı menen biybaha arxitekturalıq joybarlar tiykarında Tashkent qalasında – Islam civilizaciyası orayı, Samarqandta bolsa ullı muhaddis babamız Imam Buxariy kompleksin qurıw jumısları juwmaqlanǵanın maqtanısh penen aytıp ótpekshimen.
Ramazan kúnlerinde húrmetli ulamalarımız, ilim hám dóretiwshilik ǵayratkerleri, keń jámiyetshilik wákilleriniń qatnasıwında mine usı teberik orınlarda ullı áziz-áwliye hám ulamalarımızdıń esteligine sadaqa dasturxanların jayıp, bul muqaddes zıyarat orınlarınıń esiklerin xalqımız ushın keńnen ashıwdı rejelestirgenbiz hám bul jumıslardı álbette ámelge asıramız.
Tilekke qarsı, házirgi waqıtta dúnyanıń túrli regionlarında urıs hám tartıslar dawam etpekte. Pák niyetler qabıl bolatuǵın usı múbárek áyyyamda kelispewshilikler hám óshpenlilikler saplastırılıp, tınıshlıq, óz-ara isenim hám birge islesiw baylanıslarınıń bekkemleniwin shın kewilden tilep qalamız.
Pursattan paydalanıp, uzaq hám jaqın mámleketlerdegi watanlaslarımızǵa, pútkil musılman xalqına da qızǵın qutlıqlaw hám tileklerimizdi jollaymız.
Húrmetli watanlaslar!
Sizlerdi jaqsılıq, miyrim-shápáát hám bereket ayı – Ramazan ayınıń baslanıwı menen jáne bir márte qutlıqlayman.
Usı quwanıshlı kúnlerde bársheńizge bekkem densawlıq, shańaraqlıq baxıt, shańaraqlarıńızǵa tınıshlıq hám abadanlıq tileymen.
Oraza kúnlerinde islenetuǵın barlıq ibadatlar, jaqsı niyet hám ámeller qabıl bolsın!
Xalqımızdı, Watanımızdı Jaratqannıń ózi panasında saqlasın!
Ramazan ayı bárshemizge múbárek bolsın!

Shavkat MIRZIYoEV,
Ózbekstan Respublikası Prezidenti