Ózbekstan mámleketlik kórkem óner hám mádeniyat institutı Nókis filialında Ózbekstan “Adolat” SDP Qaraqalpaqstan Respublikası Keńesiniń baslaması menen “Abaylı bolıń, aldawshı!” atamasında aǵartıwshılıq úgit-násiyat ilajı bolıp ótti.
Ilajdıń tiykarǵı maqseti student-jaslar hám xalqımızdı aldawshılıq jaǵdaylarınan eskertiw hám olardıń aldın alıw ilajları menen tanıstırıwdan ibarat boldı.
Oǵan filialdıń professor-oqıtıwshıları, student-jaslar hám taraw qánigeleri qatnastı.
Ilajda Ózbekstan “Adolat” SDP Qaraqalpaqstan Respublikası Keńesiniń baslıǵı Nurlıbay Qaypbergenov shıǵıp sóylep, aldawshılıqtıń búgingi kúndegi kórinisleri, olardıń qurǵan duzaqları hám jeke jáne finanslıq maǵlıwmatlardı qorǵaw boyınsha zárúr usınısların aytıp ótti. Sonıń ishinde, bayanatshı tárepinen búgingi kúni turmısımızda júz berip atırǵan internet arqalı bank kartaları maǵlıwmatların sorap, jalǵan qońırawlar menen xalıqtı aldaw, sociallıq tarmaqlarda ótirik tańlaw hám sawǵalar járiyalaw arqalı aldaw jaǵdayları, respublikamızdıń aymaqlarında sońǵı waqıtları júz bergen aldawshılıq jaǵdayları boyınsha anıq dáliller keltirip, olardan qalay saqlanıw hám aldawshılıq duzaǵına túsip qalmaw boyınsha óziniń ámeliy usınısların berdi. Ilaj qatnasıwshıları menen interaktiv túrde dodalaw ótkerilip, olardıń jeke tájiriybeleri de tıńlandı.
Sonday-aq, instituttıń “Texnogen hám kórkem ónertanıw” fakulteti dekanınıń orınbasarı Jetkerbay Berdimuratov, Qaraqalpaqstan Respublikası Ádillik ministrliginiń juwaplı xızmetkeri Nuriya Berdiniyazova hám instituttıń profilaktika inspektorı Nuratdin Erimbetov shıǵıp sóylep, ilaj qatnasıwshılarına aldawshılıqtıń zamanagóy kórinisleri, olar tárepinen qollanılıp atırǵan hár qıylı usıllar hám olardıń aldın alıw ilajların tolıq túsindirildi.
Bul ilaj jaslar hám xalıqtı aldawshılıqtan eskertiw, huqıqıy sawatlılıqtı arttırıw hám jámiyette sergeklikti bekkemlewge xızmet etedi. Ilaj dawamında qatnasıwshılar ózleriniń soraw hám pikirlerin bildiriw imkaniyatına iye boldı.

Adilbay Orazov,
Qaraqalpaqstan xabar agentligi sholıwshısı