Usı jıldıń 12-19-fevral kúnleri dawamında Nókis qalasındaǵı Prezident mektebinde Qaraqalpaqstan Respublikasındaǵı “Keleshek” oraylarınıń ulıwma orta bilim beriw mekteplerinde jumıs alıp barıwshı mektep másláhátshisi lawazımı ushın sáwbet bolıp ótpekte. Bul lawazımǵa jámi 728 talaban hújjet tapsırıp, sonnan 340 ı sáwbetlesiw procesinde bilimlerin sınaqtan ótkermekte.
Ózbekstan Respublikası Prezidentiniń 2025-jıl 8-sentyabrdegi “Mektepten tısqarı bilimlendiriw sistemasın jańa basqıshqa alıp shıǵıw ilajları haqqında”ǵı qararına muwapıq, “Keleshek” oraylarınıń ulıwma orta bilim beriw shólkemlerinde vertikal sistemasın engiziw maqsetinde oqıwshılardıń baslamaların qollap-quwatlaw boyınsha mektep másláhátshisi lawazımı engizilmekte. Bunnan gózlengen maqset, mektepten tısqarı bilimlendiriw shólkemleriniń jumısın túp-tiykarınan qayta kórip shıǵıw, zamanagóy kózqaraslar tiykarında rawajlandırıw arqalı balalardıń bos waqtın mazmunlı hám nátiyjeli shólkemlestiriw, olardı intellektuallıq jaqtan jetik, Watanǵa sadıq, tariyxımızǵa hám milliy mádeniyatımızǵa húrmet ruwxında tárbiyalawdan ibarat.
Sáwbetten aldın usı jıldıń 16-yanvar kúni test sınaqları ótkerilgen edi. Bul processte usı lawazımǵa respublika boyınsha 128 mektepke jámi 728 talaban hújjet tapsırıp, sonnan 569 talaban óz bilimlerin sınaqtan ótkerdi.
Sáwbetlesiw procesi de belgilengen tártip hám talaplar tiykarında ashıq-aydınlıqta ádillik principlerine ámel etken halda shólkemlestirilip, talabanlardıń jetekshilik hám intakerlik potencialı, ámeliy tájiriybesi, mashqalalı jaǵdaylarda durıs qarar qabıl etiw qábileti, jaslar menen islesiwdegi qatnası qalıs bahalanbaqta.
Tańlaw processleriniń ádil ótiwin támiyinlew maqsetinde apellyaciya mexanizmi jolǵa qoyılǵan bolıp, múrájatlar nızamshılıq tiykarında kórip shıǵıladı.

Qaraqalpaqstan xabar agentligi.