Ózbekstan Respublikası Prezidenti Shavkat Mirziyoev 17-fevral kúni ámeliy sapar menen elimizde bolıp turǵan Ullı Britaniyanıń Oraylıq Aziya hám Ázerbayjan boyınsha sawda wákili lord Jon Olderdaystı qabılladı.
Ózbekstan menen Ullı Britaniya arasındaǵı óz-ara paydalı sheriklikti, birinshi gezekte, sawda-ekonomikalıq tarawda bunnan bılay da keńeytiw máseleleri dodalandı.
Siyasiy sóylesiw jedel rawajlanıp atırǵanı, barlıq dárejelerde almasıwlar jedel dawam etip atırǵanı atap ótildi. Qáwipsizlik tarawında nátiyjeli birge islesiw jolǵa qoyıldı.
Keyingi 5 jılda tovar almasıw 2 esege arttı. London fond birjasında Ózbekstannıń 15 milliard dollardan aslam bahadaǵı suveren hám korporativ obligaciyaları jaylastırıldı. Ótken jılı Birgeliktegi ekonomikalıq komitet mexanizmi iske qosıldı.
Britaniyalı sherikler menen birgelikte Prezident mektepleri shólkemlestirildi hám úsh birgeliktegi universitet tabıslı jumıs alıp barmaqta. Ózbekstanǵa kelip atırǵan britaniyalı turistlerdiń sanı artıp barmaqta.
Sóylesiw dawamında energetika, qarjı, geologiya, transport, ximiya, farmacevtika, ilim hám bilimlendiriw tarawlarında jańa joybarlardı alǵa qoyıw áhmiyetli ekenligi atap ótildi.
Sonday-aq, regionallıq hám globallıq áhmiyetke iye aktual máseleler boyınsha da pikir alısıldı.
Ushırasıw juwmaǵında kóp tárepleme birge islesiwdi bunnan bılay da rawajlandırıw boyınsha birgeliktegi “jol kartası”n qabıl etiwge kelisip alındı.

ÓzA