2026-2027-oqıw jılınan baslap texnikum oqıwshılarına stipendiya tóleniwi mámlekette kásiplik bilimlendiriw sistemasın jáne de rawajlandırıwǵa qaratılǵan áhmietli qádem sıpatında bahalanbaqta.
Bul baslama jaslardı zamanagóy kásiplerge keńnen tartıw, olardıń bilim alıwǵa bolǵan qızıǵıwshılıǵın arttırıw hám miynet bazarı talaplarına sáykes maman qánigeler tayarlawǵa xızmet etedi.
“Máhálleni rawajlandırıw hám jámiyetti ilgeriletiw” jılında tiykarǵı baǵdarlar boyınsha reformalardıń baǵdarlamaları hám “Ózbekstan – 2030” strategiyasın ámelge asırıw boyınsha mámleketlik baǵdarlama haqqında”ǵı Prezident pármanına muwapıq, máhállelerde óndiris hám xızmet kórsetiw tarawlarında 10 mıńnan aslam joybardı ámelge asırıw arqalı 100 mıń jańa jumıs ornın jaratıw rejelestirilgen.
Sonday-aq, máhálleler infrastrukturasın modernizaciyalaw ushın úlken kólemdegi qarjı resursları ajıratılıp, xalıqtıń turmıs sapasın jaqsılawǵa qaratılǵan jumıslar kúsheytiledi.
Kásiplerdi rawajlandırıw baǵdarında bolsa bir qatar áhmiyetli jańalıqlar engizilmekte.
Sonıń ishinde, aldıńǵı kásiplik sheberlik texnikumları negizinde “Kásipler qalashaları” shólkemlestirilip, mektep oqıwshıların erte basqıshtan-aq zamanagóy hám talap joqarı bolǵan kásiplerge baǵdarlaw maqset etilgen.
Eń áhmiyetli jańalıqlardan biri – 2026-2027-oqıw jılınan texnikum oqıwshılarına stipendiya tólew ámeliyatınıń jolǵa qoyılıwı bolıp esaplanadı. Bul bilim alıwshılardı materiallıq jaqtan qollap-quwatlaw menen birge, kásiplik bilimlendiriwdiń abırayın da arttıradı.
Bunnan tısqarı, aymaqlarda 24 mamanlıqtı bahalaw orayı shólkemlestirilip, miynet bazarında rásmiy tán alınatuǵın sertifikatlar beriw sisteması engiziledi. Bul bolsa jas qánigelerdiń básekige shıdamlılıǵın arttırıw hám olardıń jumısqa jaylasıw imkaniyatların keńeytiwge xızmet etedi.
Ulıwma alǵanda, bul reformalar kásiplik bilimlendiriwdi jańa basqıshqa alıp shıǵıw, ekonomikanı maman kadrlar menen támiyinlew hám jaslardıń turaqlı bántligin támiyinlewge qaratılǵan kompleksli qatnastı sáwlelendiredi.

Muhayyo Toshqoraeva, ÓzA