Mámleketimiz basshısı saqawat, miyrim-shápáát hám shúkirshilik ayı – Ramazan ayında ishki bazarlarda bahanıń turaqlılıǵın támiyinlew máselesine ayrıqsha itibar qarattı. Usı múnásibet penen tiyisli uyım hám shólkemlerge zárúr tapsırmalar berildi.
Joqarıdaǵı wazıypalardıń orınlanıwın támiyinlew maqsetinde Ózbekstan Respublikası Báseki komiteti tárepinen iri sawda tarmaqları hám respublika aymaqlarındaǵı sawda komplekslerine rásmiy kórsetpeler jiberildi.
Oǵan bola, Ramazan ayı qarsańında talap keskin artıwı múmkin bolǵan sociallıq áhmiyetke iye azıq-awqat ónimleri bahalarınıń turaqlılıǵın támiyinlew tiykarǵı wazıypa etip belgilendi. Usaqlap satıw tarmaqları hám aymaqlardaǵı sawda komplekslerine ónim jetkerip beriwshi kárxanalar tárepinen bahalardıń ózgeriwi jaǵdayları, logistika qárejetleriniń artıwı, ónimniń ózine túser bahasına tásir etiwshi basqa da faktorlar boyınsha Komitetti operativ túrde xabardar etip barıw talap etilmekte. Sonday-aq, jetkerip beriwshilerdi tiykarsız bahanı arttırıw jaǵdaylarına jol qoymaw boyınsha turaqlı túrde eskertip barıw boyınsha tapsırmalar berilgen.
Komitet xalqımız ushın áhmiyetli bolǵan sociallıq azıq-awqat ónimleri bahalarınıń turaqlılıǵın támiyinlew baǵdarında óz wákillikleri sheńberinde barlıq zárúr ilajlardı kóretuǵının málim etti.
Ramazan ayı dawamında bazarlarda jasalma jetispewshilik hám tiykarsız baha arttırıw jaǵdaylarınıń aldın alıw ústinen qadaǵalaw kúsheytiledi.

Nigora Rahmonova, ÓzA