Prezident Shavkat Mirziyoev 13-fevral kúni Tashkent wálayatınıń Ohangaron rayonına barıp, elektrotexnika sanaatı texnoparkindegi kárxanalardıń jumısı menen tanıstı.
Dáslepki mánzil joqarı kúshleniwli kabel ónimlerin islep shıǵarıwǵa qánigelesken “Enco Group” kárxanası boldı.
Elimizde energetika tarmaǵın jedel modernizaciyalaw, jańa elektr stanciyaları hám podstanciyalar qurıw, magistral tarmaqlardı jańalaw jáne qayta tikleniwshi energiya dereklerin keńnen engiziw boyınsha keń kólemli jumıslar ámelge asırılmaqta.
Ekonomika tarmaqları hám xalıqtıń sanınıń ósiwi nátiyjesinde elektr energiyasına bolǵan talaptıń artıp baratırǵanı joqarı kúshleniwli elektr uzatıw tarmaqların rawajlandırıwdı talap etpekte. Sol sebepli, joqarı kúshleniwli kabel ónimlerine ishki hám sırtqı bazarlarda turaqlı talap qáliplespekte.
Jumısı usı talaptı qanaatlandırıwǵa qaratılǵan “Enco Group” kárxanası Belarus Respublikasınıń “Energokomplekt” kompaniyası menen birgelikte “Eltech Industrial” texnoparki aymaǵında 21 gektar maydanda qurılmaqta. Joybardıń ulıwma bahası derlik 60 million dollardı quraydı. Kárxana tolıq quwatlılıqqa shıqqanınan soń 600 ge shamalas jańa jumıs ornı jaratıladı.
Joybar eki basqıshta ámelge asırılmaqta. Kárxana jılına 25 mıń tonna ónim islep shıǵarıwı, eksport potencialı 300 million dollardı quraytuǵını kútilmekte.
Házirgi waqıtta qurılıs jumıslarınıń birinshi basqıshı 98 procentke juwmaqlanǵan, 10 million dollardan aslam investiciya ózlestirilgen. Kárxana ónimlerin Germaniya, Latviya, Estoniya, Bolgariya hám ǴMDA mámleketlerine eksport etiw rejelestirilgen bolıp, dáslepki esap-sanaqlarǵa bola, jıllıq eksport kólemi 140 million dollarǵa jetiwi boljanbaqta.
Ótken jılı elimizge 400 million dollarǵa shamalas joqarı kúshleniwli kabel ónimleri hám izolyaciyalanǵan mıs shinalar import etilgen. Kárxana tolıq iske qosılǵannan soń 150 million dollarlıq importtıń ornın basatuǵın usınday ónim islep shıǵarıw imkaniyatı jaratıladı.
Oraylıq Aziyada bunday baǵdarda jumıs alıp barıp atırǵan 12 kárxananıń 4 ewi Ózbekstannıń úlesine tuwra keledi. Bul elimizde elektrotexnika sanaatı basqıshpa-basqısh joqarı qosımsha qun jaratatuǵın tarmaqqa aylanıp atırǵanın kórsetedi.
Mámleketimiz basshısına kárxananıń keleshektegi rawajlanıw rejeleri, óndiris kólemin keńeytiw, ónim túrlerin kóbeytiw hám lokalizaciyalaw dárejesin arttırıw boyınsha usınıslar tanıstırıldı.
Prezidentimiz sanaat kooperaciyasın keńeytiw, jergilikli shiyki zattan nátiyjeli paydalanıw, aldınǵı texnologiyalardı engiziw hám eksportqa qolaylı básekige shıdamlı ónimler islep shıǵarıwdı bunnan bılay da kúsheytiw boyınsha juwapkerlerge tiyisli kórsetpeler berdi.
Bunnan soń mámleketimiz basshısı Ohangaron rayonındaǵı “Vades Group” kompaniyası tárepinen ámelge asırılıp atırǵan joqarı texnologiyalı joybar menen tanıstı.
Bul kárxanada identifikaciya ushın mólsherlengen mikroprocessor modulleri, sim-kartalar, sonday-aq, transport, sociallıq hám xalıqaralıq tólem kartaların islep shıǵarıw jolǵa qoyıladı.
Ózbekstan Respublikası Prezidentiniń 2025-jıl 22-yanvarda “Elektrotexnika sanaatın rawajlandırıwdı jańa basqıshqa alıp shıǵıwǵa baylanıslı qosımsha ilajlar haqqında”ǵı qararı qabıl etilgen. Hújjette elektrotexnika sanaatı hám oǵan baylanıslı tarawlardı rawajlandırıw, joqarı texnologiyalıq hám joqarı qosımsha qunlı ónimler islep shıǵarıwdı xoshametlew baǵdarında wazıypalar belgilep berilgen.
Soǵan muwapıq, kárxana sanlı mámleketlik xızmetlerdi engiziw, puqaralardıń kúndelikli talapları ushın qolaylı hám qáwipsiz tólem sistemaların qáliplestiriwde zárúr bolǵan qurallardı islep shıǵaradı.
Germaniyanıń “Infineon technologies” kompaniyası menen birgelikte “Eltech Industrial” texnoparki aymaǵında shólkemlestirilip atırǵan kárxananıń ulıwma bahası 15 million dollarǵa teń.
Házirgi waqıtta qurılıs jumıslarınıń ekinshi basqıshı on bes procentke orınlanıp, 7 million dollar investiciya ózlestirilgen.
Aymaǵı 4 gektar maydandı iyelegen zamanagóy komplekste 100 ge shamalas jańa jumıs ornı jaratıladı, 6 million dollarlıq eksport ámelge asırıladı.
Maǵlıwmat ornında aytıw múmkin, 2025-jıl dawamında mámleketimizge 35 million dollarlıq mikroprocessor modulleri, sim-kartalar hám hár qıylı tólem kartaları import etilgen.
Bul kárxana tolıq iske qosılıwı esabınan 5 million dollarlıq importtıń ornın basatuǵın ónim islep shıǵarılıp, bazardaǵı ózine túser bahası úsh-bes procentke azayıwı kútilmekte.
Zamanagóy kárxanada islep shıǵarılatuǵın ónimler Qazaqstan, Tájikstan, Qırǵızstan hám Mozambik, Kambodja sıyaqlı bir qatar mámleketlerge eksport etiledi.
Mámleketimiz basshısı ǴMDA mámleketleri arasında óndiris kólemi boyınsha úshinshi orında bolıwı kútilip atırǵan bul kárxanada jaratılıp atırǵan sharayatlar, texnologiyalıq óndiris processleri menen jaqınnan tanıstı.
Prezidentimiz joqarı qunlı ónimler boyınsha innovaciyalıq qatnaslardı engiziw, jergilikli kadrlardıń potencialın arttırıw hám eksporttı bunnan bılay da keńeytiw máselelerinde áhmiyetli tapsırmalar menen usınıslar berdi.
Prezident Shavkat Mirziyoev Tashkent wálayatına saparı sheńberinde Ohangaron rayonındaǵı “Infinity Copper Group” mıs qubırları hám fitingler islep shıǵarıw kárxanasında da boldı.
Joybar Qıtay hám Germaniya kompaniyaları menen birgelikte 10 gektar maydanda ámelge asırılıp atırǵanı, onıń ulıwma bahası 36 million dollarǵa teń ekeni haqqında maǵlıwmat berildi.
Bul jerde qurılıs jumısları 90 procentke juwmaqlanǵan, joybar sheńberinde 14,9 million dollar investiciya ózlestirilgen.
Ózbekstanǵa 2025-jılı 15 million dollarlıq mıs qubırlar hám fitingler import etilgen. Bul kárxana tolıq iske qosılǵannan soń, 10 million dollarlıq importtıń ornın basatuǵın ónim islep shıǵarılıwı kútilmekte.
Kárxanada 300 jańa jumıs ornı jaratıladı, 200 milliard sum byudjet túsimleri támiyinlenedi hám 350 million dollarlıq eksport ámelge asırıladı. Ónimler Birlesken Arab Ámirlikleri, AQSh, Afrika kontinenti hám Evropa mámleketlerine jetkerip beriledi.
“Infinity Copper Group” Ózbekstanda mıs qubırları hám fitingler islep shıǵarıw kólemi boyınsha jetekshi orındı iyelep, jámi tórt óndiris kárxanasın óz ishine aladı.
Prezidentimiz elimizde mıs qubırlar hám fitingler islep shıǵarıwdı bunnan bılay da rawajlandırıw, joqarı qosımsha qunǵa iye sanaat ónimleriniń úlesin arttırıw áhmiyetli ekenligin atap ótti.
Bunday zamanagóy, básekige shıdamlı kárxanalardıń sanın kóbeytiw arqalı ishki bazardıń talabın tolıq qanaatlandırıw hám eksport potencialın jáne de keńeytiw zárúrligi atap ótildi.
Mámleketimiz basshısı Ohangaron rayonına saparı dawamında “Premier” turmıslıq texnika ónimlerin islep shıǵarıw kárxanasınıń jumısı menen de tanıstı.
Keyingi jılları mámleketimizde elektrotexnika sanaatın rawajlandırıw hár tárepleme qollap-quwatlanbaqta. Nátiyjede tarmaqqa tikkeley sırt el investiciyaların hám zamanagóy texnologiyalardı tartıw, jergilikli shiyki zat resursların tereń qayta islew, importtıń ornın basatuǵın, eksport bazarlarında básekige shıdamlı hám joqarı qosımsha qunlı ónimler islep shıǵarıw keńeydi.
Atap aytqanda, Ohangarondaǵı bul joybar da Birlesken Arab Ámirlikleriniń “Fajr Al Mustaqbal General Trading” kárxanası menen birgelikte 10 gektar maydanda ámelge asırılıp atırǵan bolıp, ulıwma bahası 30 million dollardı quraydı.
Joybar sheńberinde 250 jańa jumıs ornı jaratıladı, 4 million dollar eksport ámelge asırıladı. Házirgi waqıtta qurılıs jumısları 95 procentke orınlanıp, 11,3 million dollar investiciya ózlestirilgen.
Bul kárxanada islep shıǵarılatuǵın ónimler Ázerbayjan, Qazaqstan, Tájikstan, Rossiya, Qırǵız Respublikası, Awǵanstan sıyaqlı mámleketlerge eksport etiledi.
Házirgi waqıtta bunday kárxana Ózbekstanda ekew, Oraylıq Aziyada bolsa tórtew bolıp, olardıń arasında bul joybar ónim islep shıǵarıw kólemi boyınsha ekinshi orında turadı.
Keleshekte kompleks tolıq iske qosılıwı esabınan 87 million dollarlıq importtıń ornın basatuǵın ónim islep shıǵarılıwı kútilmekte.
Mámleketimiz basshısı kárxananıń jumıs procesin, ónimlerdiń sapasın kózden ótkerdi. Qánigeler hám jumısshılar menen sáwbetlesti.
Usı jerdiń ózinde kárxananıń 2026-2027-jıllarǵa mólsherlengen rawajlanıw baǵdarlaması tanıstırıldı. Mámleketimizdegi elektrotexnika ónimlerin islep shıǵarıwshı kárxanalardıń kórgizbesi menen tanıstı.
Prezidentimizge “Eltech Industrial” texnoparkinde ámelge asırılıp atırǵan jumıslar hám perspektivalı rejeler haqqında málimleme berildi.
Texnopark elektrotexnika sanaatın jańa basqıshqa alıp shıǵıw, joqarı qosımsha qunlı ónimler islep shıǵarıw, jańa jumıs orınların jaratıw hám eksport geografiyasın keńeytiwge qaratılǵan iri sanaat klasterine aylanbaqta. Texnopark tórt aymaqtan ibarat bolıp, ulıwma maydanı 362 gektardı quraydı. Házirgi kúnde 4 joybar iske qosılǵan, 27 joybar qáliplestirilgen. Ulıwma bahası 797 million dollar bolǵan kárxanalarda mıńlaǵan jańa jumıs orınların jaratıw hám salmaqlı eksport kólemine erisiw rejelestirilgen.
Iske qosılǵan kárxanalarda mıs qubırlar hám fitingler, mikroprocessor modulleri hám sim-kartalar, joqarı kúshleniwli kabeller jáne turmıslıq texnika ónimleri islep shıǵarılmaqta. Keleshekte júdá juqa mıs folgası, basqarıw hám SIP kabelleri, robototexnika hám elektroplatalar sıyaqlı jańa túrdegi ónimler ózlestiriledi.
– Elektrotexnika sanaatın ekonomikamız drayverlerinen birine aylandırıp, kórsetkishlerdi keleshekte on milliard dollarǵa jetkeriwdi strategiyalıq maqset etip qoyıwımız zárúr. Onıń ushın ishki hám sırtqı bazarlarda bekkem orın iyelew, básekige shıdamlı ónim islep shıǵarıw jáne taraw ushın jetik, zamanagóy bilim hám kónlikpelerge iye kadrlar tayarlawǵa ayrıqsha itibar qaratıwımız shárt, – dedi mámleketimiz basshısı.

Ziyodulla JONIBEKOV,
Abdulaziz RUSTAMOV,
Marhabo XOJIAKBAROVA,
Behruz XUDOYBERDIEV,
ÓzAnıń xabarshıları