Stambul qalasında Túrkiyanıń «Anadolu» gazetası menen birgelikte Xalıqaralıq teatr sıylıqların tapsırıw máresimi bolıp ótip, onda Berdaq atındaǵı Qaraqalpaq mámleketlik akademiyalıq muzıkalı teatrı “Eń jaqsı xalıqaralıq teatr” nominaciyası menen sıylıqlandı.
Bul jetiskenlik teatr jámáátiniń uzaq jıllıq pidákerlik miyneti, dóretiwshilik izlenisleri, túrkiy mámleketlerdiń teatrları menen alıp barılǵan birgeliktegi saxnalıq jumısları hám xalıqaralıq joybarlarda belsene qatnasıwınıń nátiyjesi bolıp esaplanadı.
Bul sıylıq teatr dóretiwshileriniń mashaqatlı miynetine berilgen joqarı baha bolıp, túrkiy dúnya teatrları arasındaǵı mádeniy baylanıslardı jáne de bekkemlewge xızmet etedi.
Berdaq atındaǵı Qaraqalpaq mámleketlik akademiyalıq muzıkalı teatrı búgingi kúnde tek ǵana respublika kóleminde emes, al xalıqaralıq saxnalarda da múnásip orın iyelep kelmekte.
Teatr dóretiwshileri saxna arqalı xalqımızdıń bay mádeniy miyrasın, milliy qádiriyatların hám zamanagóy ruwxın únles tárizde kórsetip, jas áwladtı kórkem ónerge jaqınlastırmaqta. Bul xalıqaralıq tán alıw bolsa, teatr jámáátiniń pidákerlik miyneti, dóretiwshilik potencialı hám saxna kórkem ónerine sheksiz sadıqlıǵınıń ayqın tastıyıǵı bolıp esaplanadı.

Á.Jiyemuratov,
Qaraqalpaqstan xabar agentligi