Házirgi waqıtta Mektepke shekemgi hám mektep bilimlendiriwi ministrligi tárepinen “Jıl muǵallimi” tańlawınıń ekinshi basqıshı ótkerilmekte.
Tańlaw sheńberinde qatnasıwshılar óz pánleri boyınsha oqıwshılarǵa sabaq ótip, tóreshiler quramı hám kásiplesleri olardıń sabaqlardı ótiwin, oqıwshılar menen islesiwin hám olardı sabaqqa qızıqtırıw sheberligin bahalap barmaqta.
Eń joqarı nátiyjelerdi kórsetken pedagoglar keyingi, yaǵnıy úshinshi basqıshqa usınıs etiledi.
Maǵlıwmat ushın atap ótetuǵın bolsaq, bul tańlaw 3 basqıshtan ibarat bolıp, hár bir rayonnan (qaladan) jeńimpaz bolǵan muǵallim derlik 600 million sumlıq sıylıqqa iye boladı. Ekinshi basqısh sınaqları tóreshiler tárepinen 60 ballıq sistema, sonday-aq, talaban jasaytuǵın rayon (qala) daǵı pedagoglar tárepinen 40 ballıq sistema tiykarında bahalanadı.
Sabaqlar 45 minutlıq úzliksiz, tolıq hám montajsız videokameraǵa jazıp alınıp, pedagog.uzedu.uz platformasına jaylastırıladı. Dawıs beriw de usı platforma arqalı ámelge asırıladı. Sońında hár bir rayonnan (qaladan) eń joqarı ball toplaǵan 2 talaban úshinshi basqıshqa usınıs etiledi.
– Mine, búgin Beruniy, Ellikqala hám Tórtkúl rayonları muǵallimleri arasında «Jıl muǵallimi» tańlawınıń ekinshi basqıshı ámelge asırılmaqta, -deydi tańlaw qatnasıwshısı M.Sharipbaeva. – Men Tórtkúl rayonındaǵı 22-sanlı ulıwma orta bilim beriw mektebiniń ana tili hám ádebiyatı páni muǵallimi sıpatında 8-klass oqıwshılarına sabaq óttim. Tańlawǵa qızǵın tayarlıq kórdik. Sabaq dawamında bir qatar interaktiv qurallardan, jasalma intellekt múmkinshiliklerinen, internet programmalarınan keńnen paydalandım. Bul metodlardı qollanıw ushın mektepte jaratılǵan sharayatlar qolaylı boldı. Oqıwshılar da sabaqtı qızıǵıwshılıq penen tıńladı.
Tańlaw dawam etpekte.

Á.Jiyemuratov,
Qaraqalpaqstan xabar agentligi