Nókis qalasında «Men jeńimpaz» súreni astında ǵalabalıq juwırıw marafonı bolıp ótti.
Juwırıw marafonına áskeriy xızmetkerler, sportshılar, student-jaslar, mektep oqıwshıları hám keń jámiyetshilik wákilleri qatnastı.
Jarıs 3 kilometr aralıqqa erler hám hayal-qızlar arasında ótkerildi.
– Bul sport jarısın ótkeriwden tiykarǵı maqset jaslarımızdıń fizikalıq tayarlıǵın arttırıw, salamat turmıs tárizin úgit-násiyatlaw hám olarda Watanǵa sadıqlıq ruwxın bekkemlewden ibarat, -deydi Ózbekstan Jeńil atletika Federaciyasınıń Qaraqalpaqstan bóliminiń baslıǵı Tolıbay Arzıbekov.
Qızıqlı ótken juwırıw marafonı jarısında, jaslar ózleriniń hár tárepleme shınıqqanlıǵın kórsetti hám onıń juwmaǵında birinshi orındı erler arasında R.Iskandarov, ekinshi hám úshinshi orınlardı E.Tilewmuratov hám B.Qudaybergenovlar jeńip alıwǵa miyasar boldı.
Al, hayal-qızlar arasında bolsa, E. Axbolatova jeńimpazlıqtı qolǵa kirgizgen bolsa, sıylı ekinshi hám úshinshi orınlar D.Dawbaeva hám Sh.Xalmuratovalarǵa nesip etti.
Jarıs sońında Qaraqalpaqstan Respublikası Ministrler Keńesi sekretariatınıń baslıǵı B.Qalimbetov, Qaraqalpaqstan Respublikası Sport ministri E.Qutıbaev hám «Pro Run» jarısınıń shólkemlestiriwshisi S.Erlanovlar shıǵıp sóylep, bunday sport jarıslarınıń elimizde jiyi ótkeriliwi jaslarımızdıń sportqa bolǵan qızıǵıwshılıǵın jáne de arttıradı dep atap ótti hám jeńimpazlardı qutlıqladı.
Marafon sońında jeńimpazlar hám sıylı orın iyeleri shólkemlestiriwshiler tárepinen tayarlanǵan arnawlı diplom, medal hám aqshalay sıylıqlar menen sıylıqlandı.

Adilbay Orazov,
Qaraqalpaqstan xabar agentligi sholıwshısı.