Densawlıqtı saqlaw xızmetkerleri xalqımızdıń salamatlıǵın bekkemlew jolında úlken mártlik kórsetpekte. Ózleriniń pidákerlik miynetleri arqalı xalıqtıń tán alıwına erisiw, álbette, mashaqat talap etetuǵının júrekten seziniwi de haqıyqat.
Nókis qalasındaǵı 4-sanlı shańaraqlıq poliklinikasınıń shańaraqlıq shıpakeri Raya Sultanova da mine usınday pidayı shıpakerlerden. Onıń 23 jıl dawamında arttırǵan tájiriybesi hám jumısqa sadıqlıǵı sebepli ol júzlegen insanlardıń densawlıǵın tiklewge úles qostı. Búgingi kúnde bolsa, ol tek ǵana maman shańaraqlıq shıpaker emes, al jas kadrlar ushın da turmıslıq mektep wazıypasın atqarmaqta.
1991-jılı házirgi Qaraqalpaqstan medicina institutında oqıp júrgen studentlik jıllarında-aq, ol nawqasqa mehir qoymay turıp, tájiriybeli qánige bola almaytuǵının túsindi. Ol 1998-jılı Nókis qalalıq tez járdem stanciyasında pediatr shıpaker sıpatında jumıs basladı. Dáslep teoriyanı ámeliyat penen úylestiriw qıyın boldı. Biraq ol shınıqtı, ustaz shıpakerler hám tájiriybeli miyirbiykelerden sabaq aldı. Jumıs “qaynap turǵan” usı medicina mákemesinde 5 jıl dawamında “nawqastıń awırın jeńilletiw, oǵan járdemshi bolıw” súreni onıń joldası boldı. Sol sebepli kóplegen nawqaslar onı tek ǵana jas hám miynetkesh shıpaker emes, al mehriban insan sıpatında jaqsı tanıp qaldı.
Sońınan Nókis qalalıq medicina birlespesine qaraslı 4-sanlı shańaraqlıq poliklinikada Qızıl qum, Jipek jolı, Nawrız, Náwbáhár, Bes tóbe, Jayhun sıyaqlı máhállelerde jasawshı xalıqtıń salamatlıǵın qorǵaw wazıypası júklengen 30 ǵa shamalas shıpakerler qatarına qosılıp, terapevt shıpaker bolıp isledi. Bul jerde hár bir nawqas onıń ushın jańa sınaq, jańa sabaq boldı. Kásip hám turmıs sabaǵın ózlestiriwde ustazları Rima Avezova, Sawle Jaybergenova hám Qalxan Uzaqbergenovalar járdem berdi.
– Olar mennen jumıs procesinde ózleriniń tájiriybesi hám bilimlerin ayamadı, jaqınnan járdem berdi, – deydi Raya Sultanova. – Házirgi waqıtqa kelip, ózim de jas kadrlarǵa bilgenimdi úyretip kelmektemen. Maǵan tapsırılǵan “Naӯqan baǵ” hám “Náwbáhár” mákan puqaralar jıyını aymaǵındaǵı xalıqqa miyirbiyke Biybiraba Sayımbetova menen birgelikte aymaqta kesellikler tarqalıwınıń aldın alıw, kekselerdiń, nawqaslıǵı bolǵan puqaralar hám hámiledar hayallarımızdıń jaǵdayınan xabar alıw sıyaqlı wazıypalarımızdı shın kewilden orınlawǵa háreket etip atırmız. 2025-jılı poliklinikamız eki qabatlı zamanagóy jańa imaratqa iye boldı. Barlıq xanalar zárúr medicinalıq ásbap-úskeneler menen tolıq támiyinlendi. Xalıqtı sapalı medicinalıq tekseriwden ótkeriw, sonday-aq, kerekli emlewlerdi ámelge asırıw ushın barlıq sharayatlar jaratıldı. Puqaralardı dizimge alıw, kesellik betlerin rásmiylestiriw, nawqaslardı qabıllawǵa jollaw hám náwbetti basqarıw sıyaqlı xızmetlerimiz tolıq elektron sistema arqalı ámelge asırılmaqta.
Poliklinikamızdıń oraylıq korpusınan 20 kilometr uzaqlıqta jaylasqan “Bestóbe” hám 2-3 kilometr uzaqlıqta jaylasqan “Nawqanbaǵ” elatlı punkti turǵınları ushın 2022-jıl poliklinika filialınıń jańa imaratları iske túsirilip, búgingi kúnde xalıqtıń uzaǵın jaqınlastırdı. Sonday-aq, “Shadlı awıl” xalqı ushın medicinalıq xızmetti jaqınlastırıw maqsetinde 2022-jıldan baslap 2 dana konteyner alıp kelinip, ol jerde de shıpakerlerimiz xalıqqa xızmet kórsetip kelmekte.
Salamatlıq insan ómirindegi eń áhmiyetli hám qádirli baylıq. Densawlıǵımızdı qásterlep saqlaw, bárinen burın, ózimizge baylanıslı. Sonıń menen birge, densawlıǵımızda júzege keletuǵın nuqsanlardı saplastırıwda salamatlıq saqshıları bolǵan medicina xızmetkerleriniń ornı sheksiz. Bul baǵdarda olarǵa qansha minnetdar bolsaq ta az.

M.Pirnazarova,
Qaraqalpaqstan xabar agentligi sholıwshısı.