Ekonomika hám qarjı ministrligi janındaǵı Tarmaq bazarları hám miynet ónimdarlıǵı orayı inflyaciya boyınsha ishki hám sırtqı qáwip-qáterlerdi aldınnan anıqlap, olarǵa ámeliy sheshim tabıw máselesi menen shuǵıllanıwı belgilendi.
Ministrliktiń aymaqlıq basqarmalarında oraydıń ekewden wákili boladı. Oray hár háptede rayon hám qaladaǵı bazarlardı tallap, qaysı ónimge házir qansha talap bar ekenin, bir ay, úsh ay, bir jıldan keyin talap qanday ózgeretuǵının prognoz etedi.
Bar quwatlıqlar hám qoymaxanalardaǵı ónimler talaptı qanshaǵa qaplawı, jetispeytuǵın bólegin neniń esabınan támiyinlewi boyınsha hár sherekte tiykarǵı azıq-awqat ónimleri balansı qáliplestiriledi.
– Kelesi hápteden múbárek Ramazan ayı baslanadı. Saqawat, miyrim-shápáát hám shúkirshilik belgisi bolǵan bul muqaddes kúnlerde ishki bazarlarda bahanıń turaqlılıǵın támiyinlew hár qashanǵıdan da áhmiyetli, – dedi mámleketimiz basshısı jáne diyqan bazarları hám iri sawda komplekslerinde arzanlastırılǵan azıq-awqat yarmarkaların baslaw boyınsha tapsırma berdi.
Májiliste tarmaq hám aymaqlar basshılarınıń esabatları tıńlandı.